މިދިޔަ ހޮނިހިރު ދުވަހު ރާއްޖޭގައި ބޭއްވި ރިޔާސީ އިންތިޚާބު ކުރިއަށްދިޔައީ ވަރަށް އަމާންކަމާއި އޮމާންކަމާއިއެކުގައި ކަމަށް މިއިންތިޚާބު އޮބްޒާވްކުރި ކޮމަންވެލްތު ގްރޫޕުން ބުނެފިއެވެ.

ރާއްޖޭގައި އިންތިޚާބު އޮބްޒަރކުރި ކޮމަންވެލްތު ގްރޫޕުން ބޭއްވި ނޫސްވެރިންގެ ބައްދަލުވުމުގައި ޝޭޝެލްސްގެ ކުރީގެ ރައީސް އަދި އިންތިޚާބުގައި ކޮމަންވެލްތު އޮބްސަރވާ ގްރޫޕްގެ ޗެއަރކަން ކުރެއްވި ޑެނީފޯ ވިދާޅުވީ، އިންތިޚާބު އޮބްޒާވްކޮށްފައިވަނީ ނޭޝަނަލް ކޮމަންވެލްތު އުސޫލާއި އެއްގޮތަށްކަމަށެވެ.

އޭނާ ވިދާޅުވީ، ހޮނިހިރު ދުވަހުގެ އިންތިޚާބުގެ ވޯޓުލުން ހުރިހާ މަރުކަޒުތަކެއްގައިވެސް ގަޑިއަށް ފެށިކަމަށެވެ. އަދި ވޯޓުލާ މަރުކަޒުތަކުގައި ތިބި ވެރިންވެސް ވަނީ ވަރަށް ބޮޑަށް އެކަމަށް ތައްޔާރުވެފައި ކަމަށް އޭނާ ވިދާޅުވިއެވެ.

ވޯޓުލުމަށް އައި މާބަނޑު އަންހެނުންނާއި އުމުރުން ދުވަސްވީ މީހުންނަށް އަވަސްކަމާއިއެކު ވޯޓުލުމުގެ މަގު ފަހިކޮށްދީ އެހީތެރިކަން ބޭނުންވާ މީހުންނަށް އެ ފުރުސަތު ފަހިކޮށްދީފައިވާ ކަމަށް ކޮމަންވެލްތު ގްރޫޕުން ވަނީ ފާހަގަކޮށްފައެވެ. އަދި ލޯފަން މީހުންނަށް ފުރަތަމަ ފަހަރަށް އަމިއްލަ އިހްޚްތިޔާރުގައި ވޯޓުލުމުގެ ހައްޤު ލިބިގެންދިޔަކަންވެސް ވަނީ ފާހަގަކޮށްފައެވެ.

އިންތިހާބުގައި ފާހަގަވި ރަނގަޅުކޮށްލަންޖެހޭ ބައެއް ކަންތައްތަކުގެ ތެރޭގައި ކޮމަންވެލްތް ގްރޫޕުން ފާހަގަކޮށްފައިވަނީ ވޯޓުލާ ބޫތު މަންދޫބުންނާއި އޮބްޒާވަރުންނާ މާކައިރީގައި ހުރުމުން ވޯޓުގެ ސިއްރު ހިފެހެއްޓުމަށް ދަތިވި ކަމަށެވެ. އަދި ބާތިލު ވޯޓު ގިނަކަމުން މިކަމަށް އާންމުން ހޭލުންތެރިކަން އިތުރުކުރުމަށް އެ ގްރޫޕުން ވަނީ ބާރުއަޅާފައެވެ.