ލެޕްރޮސްކޯޕިކް ސާޖަރީއާއި، އެޑްވާންސް ވުންޑްކެއަރ އައުޓްރީޗް ޕްރޮގްރާމްގެ އިތުރު ބުރެއް ކުޅުދުއްފުށީ ރީޖަނަލް ހޮސްޕިޓަލްގައި ފަށައިފިއެވެ. އެހޮސްޕިޓަލުގައި އެންމެ ފުރަތަމަ ލެޕްރޮސްކޯޕިކް ސަރޖަރީގެ ޚިދުމަތް ފެށީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ.

މި އައުޓްރީޗް ޕްރޮގްރާމްގެދަށުން އެހޮސްޕިޓަލުގައި އަނެއްކާވެސް އިތުރު ސަޖަރީތަކެއް އަންނަނީ ކުރަމުންނެވެ. އާދިއްތައިން އަންގާރަ ދުވަހާއިހަމައަށް ސާރޖަރީތައް ކުރިއަށްގެންދިޔުމަށްވަނީ ހަމަޖެހިފައެވެ. ފުރަތަމަ ސަރޖަރީއެއްގެ ގޮތުން މިބުރުކޮށްފައިވަނީ ލެޕްރޮސްކޯޕިކް ހާނިއާ އޮޕަރޭޝަނެކެވެ. މިއީ އެހިސްޕިޓަލުގައި ކުރެވުނު މިފަދަ ފުރަތަމަ އޮޕަރޭޝަނެވެ.

ކުޅުދުއްފުށީ ރީޖަނަލް ހޮސްޕިޓަލުގައި ސަރޖަރީތައް ލީޑުކުރައްވާފައިވަނީ ތަޖުރިބާކާރު ލެޕްރޮސްކޯޕިކް ސާރޖަން، ހެޑް އޮފް ޖެނެރަލް ސާރޖަރީ ޑިޕާރޓްމެންޓް، ސީނިޔަރ ކޮންސަލްޓަންޓް ސާރޖަރީ، ޑރ. އަބްދުﷲ ޢުބައިދުކަމަށް ކޭއާރްއެޗްއިން ވިދާޅުވެއެވެ. މީގެއިތުރުން އައި.ޖީ.އެމް.އެޗްގެ އެސިސްޓެންޓް މެޑިކަލް ޑިރެކްޓަރ އަދި ހެޑް އޮފް ސާރޖަރީ ޑިޕާރޓްމެންޓް، ކޮންސަލްޓަންޓް ސަބް ސްޕެޝަލިސްޓް، ޑރ. މުޙައްމަދު ވަޙީދާއި، އައި.ޖީ.އެމް.އެޗާއި، ކޭ.އާރު.އެޗުގެ ޑަކްޓަރުންނާއި ނަރުހުންގެ ޓީމަކުން ބައިވެރިވާކަމަށް ކޭއާރްއެޗުން މަޢުލޫމާތުދެއްވައެވެ.

މި ސަރުކާރުން ވަނީ މާލެއަށް އައިސް ޑޮކްޓަރަށް ދެއްކުމުގެ ބަދަލުގައި އަތޮޅުތެރޭގައި ހުރި ރީޖަނަލް ހޮސްޕިޓަލްތަކުން ސަރޖަރީއަށް ރިފަރކުރާ ބަލިމީހުންނަށް ބޭނުންވާ ސަރޖަރީތައް ރަށުގައި ތިބެގެން ކުރެވޭނެ މަގު ފަހިކޮށްދީފައެވެ. އެގޮތުން ރާއްޖޭގެ ބޮޑެތި ހޮސްޕިޓަލްތަކުގައި، އައިޖީއެމްއެޗްގެ ޑޮކްޓަރުންގެ އެހީތެރިކަމާއެކު ކުޑަ ތަންކޮޅެއް ކަފާލައިގެން، ކުރާ ލެޕްރޮސްކޯޕިކް ސާޖަރީގެ އިތުރުން އެޑްވާންސް ވުންޑްކެއަރގެ ޚިދުމަތް ނުވަތަ ދިގުމުއްދަތަށް ރަނގަޅުނުވެ ހަށިގަނޑިގައި ހުންނަ ފާރުގަނޑު ރަނގަޅުކުރުމަށް ދޭ ފަރުވާ އަންނަނީ ދެމުންނެވެ. މިގޮތުން މިޚިދުމަތް ފަށާފައިވާ އެއް ހޮސްޕިޓަލަކީ ކުޅުދުއްފުށި ރީޖަނަލް ހޮސްޕިޓަލްއެވެ.