ހައިރާންކުރުވަނިވި ނަތީޖާތައް ފެނިގެން ދިޔަ 2023 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރުގައި ވާދަކުރެއްވި ތިން ކެންޑިޑޭޓަކަށް، ލިބުނު ވޯޓު ބާޠިލްވޯޓުގެ އަދަދަށް ވުރެވެސް މަދުކަން އިލެކްްޝަންސް ކޮމިޝަނުން ހާމަކުރި ވަގުތީ ނަތީޖާއިން ދައްކައިފިއެވެ.

ސެޕްޓެންބަރުމަހުގެ 9 ވަނަ ދުވަހު ބޭއްވި ރިޔާސީ އިންތިޚާބުގެ ވަގުތީ ޖުމުލަ ނަތީޖާ، އިލެކްޝަންސް ކޮމިޝަނުން މިއަދު ވަނީ އާއްމުކޮށްފައެވެ.

ވަގުތީ ނަތީޖާ ދައްކާގޮތުން، މިއަހަރުގެ ރިޔާސީ އިންތިޚާބުގައި ވާދަކުރި 8 ކެންޑިޑޭޓުންގެ ތެރެއިން، ތިން ކެންޑިޑޭޓަކަށް ލިބިވަޑައިގަތީ 1 ޕަސެންޓް ވޯޓަށްވުރެވެސް މަދުންނެވެ. އެއީ އަމިއްލަ ގޮތުން ވާދަކުރެއްވި ދެ ކެންޑިޑޭޓުންނަށާއި، އެމްއެންޕީގެ ކެންޑިޑޭޓެވެ. މިއިންތިޚާބުގައި، 4835 މީހުންލީ ވޯޓު ބާޠިލްވި އިރު، އަމިއްލަ ގޮތުން ރިޔާސީ އިންތިޚާބުގައި ވާދަކުރެއްވި، އަޙްމަދު ފާރިޝް މައުމޫނަށް، ލިބިވަޑައިގަތީ، 2979 ވޯޓެވެ. އެމްއެންޕީގެ ކެންޑިޑޭޓް ކާނަލް މުހައްމަދު ނާޒިމަށް ލިބިވަޑައިގަތީ، 1907 ވޯޓެވެ. އަދި އަމިއްލަ ގޮތުން ވާދަކުރެއްވި، ކެންޑިޑޭޓް ޙަސަން ޒަމީލަށް ލިބިވަޑައިގަތީ، 327 ވޯޓެވެ.

މިއަހަރުގެ ރިޔާސީ އިންތިޚާބަކީ މިހާތަނަށް ބޭއްވުނު އެންމެ މިނިވަން އިންސާފުވެރި އިންތިޚާބު ކަމުގައި ހުރިހާ ފަރާތްތަކަކުންވެސް ޤަބޫލުކުރެއެވެ.