އިއްޔެ ބޭއްވި ރިޔާސީ އިންތިޚާބު އެއްވެސް ބޭފުޅަކަށް އެއް ބުރުން ކާމިޔާބު ނުވެ 2 ވަނަ ބުރަކަށް ދާންޖެހިއްޖެއެވެ.

އިންތިޚާބުގައި ބެހެއްޓުނު ފޮށިތަކުގެ ވަގުތީ ނަތީޖާ ދައްކާގޮތުން 46.15 އިންސައްތަ ވޯޓާއެކު ކުރީގައި އުޅުއްވަނީ ޕީއެންސީގެ ކެނޑިޑޭޓް ޑރ. މުހައްމަދު މުއިއްޒުއެވެ. މުއިއްޒުއަށް 101453 ވޯޓް ލިބިވަޑައިގެންފައިވެއެވެ.

2 ވަނައިގައި 39.09 އިންސައްތަ ވޯޓާއެކު އުޅުއްވަނީ އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހެވެ. އެމަނިކުފާނަށް 85920 ވޯޓް ލިބިވަޑައިގެންނެވިއެވެ.

ވަގުތީ ނަތީޖާއިން 3 ވަނަ ލިބޭނީ ޑިމޮކްރެޓްސްގެ ކެންޑިޑޭޓް އިލްޔާސް ލަބީބަށެވެ. އެއީ 15807 ވޯޓާއިއެކުގައެވެ. 4 ވަނައިގައި އުޅުއްވަނީ އަމިއްލަގޮތުން ވާދަކުރެއްވި ޢުމަރު ނަސީރެވެ. އެމަނިކުފާނަށް ލިބިވަޑައިގަތީ 6339 ވޯޓެވެ.

5 ވަނައިގައި 5460 ވޯޓާއިއެކު އުޅެނީ ޖުމްހޫރީ ޕާޓީގެ ރިޔާސީ ކެނޑިޑޭޓް ގާސިމް އިބްރާޙީމްއެވެ. 6 ވަނަ ލިބެނީ އަމިއްލަގޮތުން ވާދަކުރެއްވި ފާރިސް މައުމޫނަށެވެ. އެއީ 2979 ވޯޓެވެ. އެމްއެންޕީގެ ކެންޑިޑޭޓް މުހައްމަދު ނާޒިމަށް 1906 ވޯޓާއިއެކު އުޅެނީ 7 ވަނައިގައެވެ. ހަސަން ޒަމީލަށް ލިބެނީ 8 ވަނައެވެ. އެއީ 325 ވޯޓެވެ.

އިންތިހާބުގެ 2 ވަނަ ބުރު އޮންނާނީ މިމަހުގެ 30 ވަނަ ދުވަހުއެވެ. ވަރަށް އަވަހަށް ރީރަޖިސްޓްރޭޝަންއަށް ހުޅުވާލާނެކަމަށް އިލެކްޝަންސް ކޮމިޝަނުން ވަނީ ބުނެފައެވެ.