ދިވެހިރާއްޖޭގެ ތާރީޚުގައިވެސް އެންމެ ގިނަ ކެންޑިޑޭޓުން ވާދަކުރާ ރިޔާސީ އިންތިޚާބު ވޯޓުލުން މިއަދު ހެނދުނު ފަށައިފިއެވެ.

މިފަހަރުގެ ރިޔާސީ އިންތިޚާބުގައި، 282،395 މީހުންނަށް ވަނީ ވޯޓުލުމުގެ ޙައްޤު ލިބިފައެވެ. މިފަހަރުގެ އިންތިޚާބަށް ، 574 ވޯޓުފޮށި ބަހައްޓާފައި ވާއިރު، މާލޭގައި 176 ވޯޓުފޮށި އަދި ރާއްޖެއިން ބޭރުގައި، 8 ވޯޓުފޮށި ބަހައްޓާފައިވެއެވެ.

މި އިންތިޚާބުގައި ޖުމުލަ 8 ކެންޑިޑޭޓުން ވާދަކުރާއިރު، މިއީ މިހާތަނަށް ރާއްޖޭގައި އެންމެ ގިނަ ކެންޑިޑޭޓުން ވާދަކުރައްވާ ރިޔާސީ އިންތިޚާބެވެ.

ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ވަނީ، ވޯޓު ލައްވާފައެވެ.

މިއަދު ބާއްވާ ރިޔާސީ އިންތިޚާބުގައި އެއްވެސް ފަރާތަކަށް %50 ވޯޓު ނުލިބިއްޖެނަމަ އެންމެ ގިނަ ވޯޓު ލިބުނު ދެ ކެނޑިޑޭޓުންގެ މެދުގައި ދެވަނަ ބުރެއް ބާއްވާނެއެވެ.

ރިޔާސީ އިންތިޚާބުގެ ދެވަނަ ބުރު ބޭއްވުމަށް ހަމަޖައްސާފައި ވަނީ، މި ސެޕްޓެންބަރު މަހުގެ 30ވާ ހޮނިހިރުދުވަހުގައެވެ.