އިސްލާމީ ވެރިކަމެއްގައި އެންމެ މުހިންމު އެއްސިފައަކީ މަޝްވަރާގެ މަތިން އެ ވެރިކަމެއް ކުރުން ކަމަށާއި، އެ މާތް ސިފަ، ރައީސުލްޖުމްޙުރިއްޔާ އިބްރާޙިމް މުޙައްމަދުގެ ފުށުން ފެނުނުކަމަށް ދީނީ ޢިލްމުވެރިޔާ އައްޝައިޙް އިލްޔާސް ޖަމާލް ވިދާޅުވެއްޖެއެވެ. ޝައިޙް އިލްޔާސް މިހެން ވިދާޅުވީ "ނޫން" އަށް ދެއްވި ޙާއްސަ އިންޓަވިއުއެއްގައެވެ.

ރައީސް ޞާލިޙްގެ މި މާތް ސިފަފުޅު ސިފަކުރައްވަމުން ޝައިޙް އިލްޔާސް ވިދާޅުވީ، ތަފާތު ވިސްނުމުގެ ސިޔާސީ ބޭފުޅުންނާއި ޕާޓިތަކާއި އެކު، ކެތްތެރިކަން އިސްކުރައްވައި މަޝްވަރާގެ އުސޫލުން ކަންކަން ކުރެއްވުމުގައި ރައީސް ޞާލިޙް ދެމިހުންނެވިކަމަށެވެ. މި މޭރުމުން ވާހަކަފުޅު ކުރިޔަށް ގެންދަވަމުން އިތުރަށް ވިދާޅުވީ، އިސްލާމީ ވެރިކަމެއްގައި ދެން އެންމެ މުހިންމު އެއް ސިފައަކަށް ވާންވާނީ، ވަޢުދު ފުއްދުމަށްޓަކާ މަސައްކަތްކުރުމެވެ. އެގޮތުން ޝެއިޙް އެންމެ ފާހަގަ ކުރެއްވީ ކޯލިޝަނަކުން ވެރިކަމަށް ވަޑައިގެން، އެ ކޯލިޝަން ދަމަހައްޓާނެކަމަށް ވެ ވަޑައިގެންނެވި ވަޢުދެވެ. އަދި އެކަންވެސް ވަނީ ރައީސް ޞާލިޙްގެ ފުށުން ފެނިފައިކަން ފާހަގަ ކުރެއްވެވިއެވެ.

ޤައުމެއްގެ ވެރިކަން ކުރައްވާއިރު، ދެން އެންމެ މުހިންމު ސިފައަކަށް އެ ރައީސެއްގެ ކިބައިގައި ހުންނަން ޖެހިވަޑައިގަންނަވާނެކަމަށް ޝެއިޙް އިލްޔާސް ވިދާޅުވީ، ޤައުމުގެ ބައިތުލް މާލަށް ރައްކާތެރިވުމެވެ. އެގޮތުން ރާއްޖޭގައި ތަރައްޤީގެ ގިނަ މަޝްރޫޢުތަކެއް މިހާރު ވެސް ހިނގަމުން ދާއިރު، ރާއްޖޭގެ ރައީސުލް ޖުމްހޫރިއްޔާ ދަޢުލަތުގެ މުދަލުގައި ޖެހިފައިވާތަން ފެނިފައިނުވާކަން ފާހަގަ ކުރެއްވިއެވެ.

ޝޭހު އިލްޔާސް ޖަމާލްގެ ޙާއްސަ އިންޓަވިއު

މީގެ އިތުރުން، ރައްޔިތުންގެ ވެރިއަކަށް އަންނަ ވެރިއެއްގެ ގައިގައި އޯގާތެރިކަމުގެ ސިފަ ހުރުމުގެ މުހިންމުކަމަށް އަލި އަޅުވާލެއްވިއެވެ. އެގޮތުން ރައްޔިތުންގެ ޚާދިމަކަށް އަންނަ ބޭފުޅަކީ ހުރިހާ ރައްޔިތުންގެ އިޙްސާސްތައް ދަންނަ، އަދި ހަމަހަމަކަމާއިއެކު އަޅާލާ އޯގާތެރިކަން ފޯރުކޮށްދެވޭނެ ކެތްތެރި ވެރިއަކަށް ވާންޖެހޭނެކަމަށް ޝެއިޙް އިލްޔާސް ވިދާޅުވިއެވެ. އަދި މި ސިފަފުޅުވެސް ރައީސް ޞާލިޙްގެ ފުށުން ފެންނަކަމާއި، ރައީސްއަކީ ހަތުރުންނާއި މިތުރުންނާއިއެކު ވެސް މަސައްކަތް ކުރެވޭނެ ކެތްތެރި ބޭފުޅެއްކަން ޝެއިޙް ފާހަގަ ކުރެއްވިއެވެ.

ދެން ޝެއިޙް އިލްޔާސް ފާހަގަ ކުރެވީ ހަމަޖެހުން ޤާއިމް ކުރެއްވުމުގެ މުހިންމުކަމުގެ ވާހަކައެވެ. އެގޮތުން، ރައީސް ޞާލިޙްގެ މި ސިފަފުޅު ވެސް ހުންނަކަން ފާހަގަ ކުރައްވާ ވިދާޅުވީ، އެކަމުގެ ހެއްކަކީ މިއަދު ޤައުމުގައި އޮތް އަމާންކަން ކަމަށެވެ. އަދި ތަރައްޤީއާއި އެހެނިހެން ކަންކަން ވެސް ތަނަކަށް އަންނާނީ އެތަނެއްގައި އަމާންކަން ޤާއިމްވުމުންކަމަށް ޝެއިޙް ވިދާޅުވިއެވެ.

މިކަމުގެ މުހިންމު ކަމަށް އަލިއަޅުވާލައްވަމުން ޝެއިޙް ޙިއްސާ ކުރެއްވީ އިސްލާމީ ތާރީހާއި ގުޅުންހުރި ވާހަކައެކެވެ. އެގޮތުން މައްކާއަށް ވަޑައިގެންނެވުމަށްފަހު، އިސްމާއިލް އަލައިހިއްސަލާމް އާއި ހާޖަރު އަލައިހިއްސަލާމް ހަނަފަސް ސަހަރާއެއްގައި ދޫކުރައްވައި އިބްރާޙިމްގެ ފާނު ވަޑައިގެން ކުރެވި ދުޢާ ވެސް އެންމެ ފުރަތަމަ ޙާއްސަ ކުރެއްވީ މައްކާގައި އަމަން އަމާންކަން ޤާއިމް ކުރެއްވުމަށްކަމަށް ވިދާޅުވިއެވެ.

އިންޓަވިއު ނިންމާލައްވަމުން ޝެއިޙް ވިދާޅުވީ، ދިވެހިރާއްޖޭގައި އަމާންކަން ޤާއިމްކުރުމަށާއި، ރާއްޖޭގެ ސިޔާދަތު ހިމާޔަތްކޮށް އަދި ދީން ދިފާޢު ކުރުމަށް އެންމެ ރަގަޅު ކެނޑިޑޭޓެއްގެ ގޮތުގައި ފާހަގަ ކުރެވެނީ ރައީސް އިބްރާޙިމް މުޙައްމަދު ޞާލިޙް ކަމަށެވެ.