ރައީސް ޔާމީނުގެ ސަރުކާރުގައި އެންމެ ބޮޑު ގޮންޖެހުންތަކެއް ކުރިމަތިލާން ޖެހުނު އެއްބަޔަކީ ނޫސްވެރިންނެވެ. ނޫސްވެރިންގެ ހައްގުތައް ހޯދުމަށް އެތައް ފަހަރެއްގެ މަތިން އެމީހުން މަސައްކަތްކުރިއެވެ. ނަމަވެސް އަބަދުވެސް އެންމެން ވެސް ތިބީ ކޮންމެސް ކަހަލަ ބިރުވެރިކަމެއްގެ ތެރޭގައެވެ.

ނުވަ އަހަރު ވަންދެން ނޫސްވެރިޔެއްގެ ގޮތުގައި މަސައްކަތް ކޮށްފައިވާ ހައްވާ މުޙައްމަދު (ހައްވި) ނޫނަށް ދިން ހާއްސަ އިންޓަރވިއުގެއްގައި ބުނީ  އޭރުގެ ބިރުވެރިކަން އަދިވެސް ހަނދާންވާ ކަމަށާއި، ޚަބަރުތައް ލިޔެލާއިރަށް ދެން ބަލާ އަންނާނީ ކޮންފަރާތަކުން ކަމެއް، ކޮށްލާނެ ޖޫރިމަނާއެއް ނުވަތަ ގެންގޮސް ލާނެ ގޮޅިއެއް ނޭނގިފައި ތިބެން ޖެހޭ ދުވަސްތައް ވެސް އޭރު މަދު ނޫން ކަމަށެވެ. އެހެންކަމުން، ނޫސްވެރިން ނަށް ރައީސް ޔާމީންގެ ވެރިކަމުގައި ބިރުވެރިކަމާއި މިނިވަންކަމެއް ނެތްކަން އިހުސާސް ވެގެން ދިއަކަމަށް ހައްވި ފާހަގަކުރިއެވެ.

އަދި ރައީސް ސޯލިހުގެ މި ފަސް އަހަރު ތެރެއިން 3 އަހަރު ނޫސްވެރިއެއްގެ ގޮތުގައި މަސައްކަތް ކުރިކަމަށާއި މި ވޭތުވެދިޔަ އަހަރު ތަކުގައި އެއްވެސް ނޫސްވެރިއެއް ޖަލަށްލާފައި ނުވާކަމަށާއި، ނޫސްތައް ޖޫރިމަނާ ކޮށް ނުހަދާކަމަށް ހައްވި ބުންޏެވެ. އަދި އެއްވެސް ނިއުސް ސްޓޭޝަން އެއް ބަންދުކޮށްފައި ނުވާކަމަށާއި، ނޫސްވެރިންނަށް ލިބިގެންދިއަ މިނިވަންކަން އޭގެ ޒާތުގަ ބޭނުންކުރުމުގެ ބާރު ލިބިގެންދިއުމުން ނޫސްވެރިޔާ ލިޔަން ބޭނުންވާ ޚަބަރު މި 5 އަހަރު ތެރޭގައި ލިޔެފައި ވާތަން ފެނިއްޖެ އަދި ރައީސްގެ އަބުރު ގެއްލޭފަދަ ލިޔުންތައް ވެސް ލިޔެފައިވާއިރު ރައީސް އެއަށް ރިއެކްޓް ކޮށްފައި ނުވާކަން ހައްވި ފާހަގަކުރިއެވެ. އެހެންކަމުން، ހައްވި ދެކެނީ މި ސަރުކާރުގައި ނޫސްވެރިންގެ މިނިވަންކަން މާ ބޮޑަށް ވެސް ހިމާޔަތްކޮށްދީފައިވާ ކަމަށެވެ.

ހައްވި އިތުރަށް ފާހަގަކޮށްލީ، ކޯލިޝަނަކާއެކު ވެރިކަމަށް އައުމަކީ ތަފާތު އެކި އެޖެންޑާ ގެންގުޅުއްވާ އެކި ފިކުރުގެ މީހުނާއެކު ސަރުކާރު ހިންގަން ޖެހޭނެ ކަމެއް ކަމަށާއި މިކަމަށް ހާއްސަ ޤާނޫނެއް ނެތުމުން އެކަކަށް ވެސް މިކަން ކާމިޔާބު ވެދާނެ ކަމަށް ހީނުކުރާ ކަމަށެވެ. ނަމަވެސް، ކަމެއް ކުރަން ބޭނުންވެއްޖެއްޔާ ކުރެވޭނެކަމާއި، 5 އަހަރު ނިމުނުއިރު ކޯލިޝަން ދެމެހެއްޓިދާނެކަން މިވަނީ ވަރަށް އިޙުލާސްތެރިކަމާއި ކެތްތެރިކަމާއެކު ރައީސް ސޯލިހު ސާބިތުކޮށްދީފައިކަން ހައްވި ފާހަގަކުރިއެވެ.