ރާއްޖޭގެ އިތުރު 11 ރަށަކަށް ހެލްތް މިނިސްޓްރީން އެމްބިއުލާންސް ފޯރުކޮށްދީފިއެވެ.

ސިއްހީ ނިޒާމު ފުޅާކޮށް ރާއްޖޭގެ އެކި ރަށްރަށައް އެމްބިއުލާންސް ފޯރުކޮށްދިނުމަށް ކުރަމުންދާ މަސައްކަތުގެ ދަށުން މިހާރު ގިނަ ރަށްރަށަކަށް ވަނީ އެމްބިއުލާންސް ފޯރުކޮށްދީފައެވެ.

11 ރަށަކަށް އެމްބިއުލާންސް ފޮނުވުމަށް ބޭއްވި ރަސްމިއްޔާތުގައި މީޑިއާއަށް މައުލޫމާތުދެއްވަމުން ހެލްތް މިނިސްޓްރީގެ ސްޓޭޓް މިނިސްޓަރ އަޙްމަދު އާދިލް ވިދާޅުވީ، މިހާތަނަށް ސަރުކާރުން ރާއްޖޭގެ 133 ރަށަކަށް އެމްބިއުލާންސް ފޯރުކޮށްދެއްވާފައިވާކަމަށެވެ. މިއީ މިހާތަނަށް ސަރުކާރަކުން އެންމެ ގިނަ ޢަދަދަކަށް ރަށްރަށަށް އެމްބިއުލާންސް ފޮނުވި ފަހަރުކަން އޭނާ ފާހަގަކުރެއްވިއެވެ.

“މިއަދު އަޅުގަނޑުމެން މި ފުރުވާލާނީ 11 ރަށަކަށް 11 އެންބިއުލާންސް. މިއަދުގެ ސަރުކާރުން ރާއްޖޭގެ 133 ރަށަކަށް އައު އެންބިއުލާންސް ވާނީ ފޯރުކޮށްދީފައި. އަދި މިމަހުގެ 10 ވާ ހުކުރު ދުވަހު އިތުރު 9 އެންބިއުލާންސް ރާއްޖެ ވަންނާނެ. އެ އެންބިއުލާންސްތައްވެސް ރާއްޖެ އައިހާ އަވަހަކަށް ކްލިއަރ ކޮށްފައި ބާކީހުރި ރަށްތަކަށް ފޮނުވާލަ ދޭނަން." އަޙްމަދު އާދިލް ވިދާޅުވިއެވެ.

އެމްބިއުލާންސް ފޮނުވި ރަށްތަކުގެ ތެރޭގައި ހިމެނެނީ ހއ. މުރައިދޫ، ހއ. ތަކަންދޫ، ނ. ޅޮހި، ނ. މަގޫދޫ، ރ. ރަސްގެތީމު، ބ. ގޮއިދޫ، ކ. ތުލުސްދޫ، ވ. ފެލިދޫ، ށ. ކަނޑިތީމު، ލ. ހިތަދޫ އަދި ހއ. އުތީމެވެ.

ހެލްތް މިނިސްޓްރީން މި އެމްބިއުލާންސްތައް ރާއްޖެ ގެނެސްފައިވަނީ އެސް.ޓީ.އޯއާއި ގުޅިގެންނެވެ. 20 އެމްބިއުލާންސް ގެނައުމަށް އެސް.ޓީ.އޯއާއި ހަވާލުކޮށްފައިވަނީ މިދިޔަ އޭޕްރީލް މަހުގެ ތެރޭގައެވެ.