ރާއްޖޭގެ ކުދި އަދި މެދުފަންތީގެ ވިޔަފާރިތަކަށް ބާޒާރު ހޯދައި ދިނުމަށް ބިޒްނަސް ސެންޓަރ ކޯޕަރޭޝަނުން ކުރަމުންދާ މަސައްކަތްތަކުގެ ތެރެއިން 2022 ވަނަ އަހަރުގެ ޑިސެންބަރު މަހުގެ ތެރޭގައި ހުޅުވި އެސްއެމްއީ ހަބަކީ ވަރަށް ކާމިޔާބުކަމާއެކު ހިދުމަތް ފޯރުކޮށްދެވެމުންދާ ތަނެކެވެ. މިފަދަ ހަބެއް ހުޅުވުމުގެ މަޤްސަދަކަށްވީ ގޭތެރޭގައި މަސައްކަތްކުރަމުން އައި ކުދި ވިޔަފާރިތަކަށް، ބޮޑު ޚަރަދެއް ކުރަން ނުޖެހި، ކުޑަ ވިޔަފާރިއެއް ހިނގުމުގެ ތަޖުރިބާ ކޮށްލުމަށް މަގުފަހި ކޮށްދިނުމެވެ. މީގެ އިތުރުން، ހަބްގައި ވިޔަފާރިކުރައްވާ ފަރާތްތަކަށް ބޭނުންވާ ފަންނީ އެހީތެރިކަން ފޯރުކޮށްދީ، އެ ވިޔަފާރިތައް އިތުރު ހަރުފަތަކަށް ގެންދިއުމަށް އެހީތެރިވެދިނުމެވެ.

އެސްއެމްއީ ހަބުގެ ގްރައުންޑް އަދި ފުރަތަމަ ފަންގިފިލާއިން ޖުމްލަ 90 އަށް ވުރެ ގިނަ ކުދި ވިޔަފާރިތަކަށް ފުރުސަތު ދީފައިވާއިރު އެސްއެމްއީ ހަބު މިހާރު ވެފައިވަނީ އާންމުންގެ މެދުގައި މަގްބޫލު ތަނަކަށެވެ. މިވަގުތު އެސްއެމްއީ ހަބުގައި ހިންގަމުން އަންނަނީ ފޮތް ވިއްކާ ފަރާތްތަކާއި، ގަސް ވިއްކާ ފަރާތެއްގެ އިތުރުން ކާބޯތަކެތި ވިއްކާ ވިޔަފާރިތަކެވެ. އެސްއެމްއީ ހަބް ވެގެން ގޮސްފައި މިވަނީ ކުދި ވިޔަފާރިތަކަށް ލިބުނު ރަނުގެ ފުރުސަތަކަށެވެ.

އެސްއެމްއީ ހަބުގެ ޚިދުމަތް ފުޅާކޮށް، އިތުރު ސިނާއަތްތައް ހިމެނޭހެން ގިނަ ކުދި ވިޔަވާރިތަކަކަށް ފުރުސަތު ދިނުމަށް، އެސްއެމްއީ ހަބުގެ 2 ވަނަ ފަންގިފިލާ ރޭ ވަނީ ހުޅުވާފައެވެ. އެސްއެމްއީ ހަބުގެ ދެވަނަ ފަންގިފިލާ ހުޅުއްވައިދެއްވީ އެސްޓީއޯގެ މެނޭޖިންގ ޑިރެކްޓަރ އަބްދުﷲ ސައީދުއެވެ.

Advertisement

އެސްއެމްއީ ހަބްގެ 2 ވަނަ ފަންގިފިލާ ހުޅުވުމުގެ ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓްރީގެ ސްޓޭޓް މިނިސްޓަރ ނީޒާ އިމާދު ވިދާޅުވީ، ކުދި ވިޔަފާރިތަކަށް މިފަދަ އިތުރު ހަބުތަކެއް ރާއްޖޭގެ އެކި ސަރަހައްދުތަކުގައި ހުޅުވުމުގެ މަސައްކަތް ކުރިއަށްދާކަމަށެވެ. އެގޮތުން އައްޑޫ ސިޓީއާއި ކުޅުދުއްފުށީ ސިޓީގައި ހަބުތަކެއް ހުޅުވި ވަރަށް އަވަހަށް ހިދުމަތް ދޭން ފަށާނެކަމަށް ނީޒާ ވިދާޅުވިއެވެ.

އެސްއެމްއީ ހަބުގެ ދެވަނަ ފަންގިފިލާއިގައި ސެލޫނަކާއި، އާޓް އެންޑް ކްރާފްޓް އަދި ގާމެންޓަށް ހާއްސަ ކިއޮސްކްތައް ހުންނާނެވެ. އަދި ކުރެހުންތެރިންގެ މަސަކަތްތައް ޕްރޮމޯޓް ކުރުމަށް ގެލެރީއަކާއި ގޭމިންގ އޭރިއާއެއްގެ އިތުރުން ކުޑަކުދިންނަށް ހާއްސަ ޕްލޭ އޭރިއާއެއް ހިމެނޭނެއެވެ. އަދި ހަމަ އެހެންމެ ދިވެހި އުފެއްދުންތައް އުފައްދާ ފަންނާނުންނަށް ހާއްސަކޮށްގެން މިތަނުގައި ޤާއިމްކޮށްފައިވާ މިނީ ސިނަމާ ކައިރި މުސްތަގުބަލެއްގައި ހުޅުވިގެންދާނެކަމަށް ބީސީސީން މައުލޫމާތުދެއެވެ.