ޕާކިންގ ޖޫރިމަނާތައްވެފައިވާ މީހުން ދައުލަތަށް ދައްކަންޖެހޭ ޖޫރިމަނާ ފައިސާ މަޢާފްކޮށްދެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ނިންމަވައިފިއެވެ.

ސަރުކާރުގެ ފަރާތުން މިއަދު ނެރުނު ނޫސްބަޔާނެއްގައި ބުނެފައި ވަނީ، ޕާކިންގ ޖޫރިމަނާތައް މަޢާފްކޮށްދެއްވުމަށް ރައީސުލްޖުމްހޫރިއްޔާ ނިންމަވާފައި ވަނީ، މާލޭގައި އެކަށީގެންވާ ވަރަށް ޕާކު ކުރާނެ ޖާގަތައް ނެތްނަމަވެސް، ޕާކިން ސްޓިކާތައް ޖަހައި ޖޫރިމަނާކުރަމުންދާތީ، ރައްޔިތުން ކުރާ ޝަކުވާއަކީ ރައީސުލްޖުމްހޫރިއްޔާއަށްވެސް ޤަބޫލު ކުރެއްވޭ ޝަކުވާއަކަށްވާތީ ކަމަށެވެ.

ޕާކިން ޖޫރިމަނާގެ އިތުރު، ޓްރެފިކާއި ގުޅޭ އެހެނިހެން ޖޫރިމަނާތައްވެސް ވަކި އުސޫލެއްގެ ދަށުން މަޢާފްކޮށްދެއްވުމަށް ރައީސުލްޖުމްހޫރިއްޔާ ނިންމަވާފައިވާ ކަމުގައިވެސް ސަރުކާރުން ވަނީ ބުނެފައެވެ.

2018 ވަނަ އަހަރުގެ ރިޔާސީ އިންތިޚާބުގެ ދުވަސްވަރު، ރައީސް ޔާމީނުގެ ސަރުކާރުންވެސް ވަނީ، ޓްރެފިކް ޖޫރިމަނާތައް މަޢާފްކޮށްދެއްވާފައެވެ.

ޕާކިންގ ޖޫރިމަނާއާ ލައިސަންސް ޖޫރިމަނާތައް ނުދެއްކި އެކަމުގެ ތަކުލީފު އުފުލަން އެންމެ ބޮޑަށް އުފުލަންޖެހިފައި ވަނީ ފުރާވަރުގެ ޒުވާނުންނަށެވެ.