ދަރިމައިނުވުމުގެ މައްސަލައަކީ މުޅި ދުނިޔޭގައި ވެސް އިތުރުވަމުން އަންނަ ސިއްޙީ މައްސަލައެކެވެ. ވޯލްޑް ހެލްތް އޯގަނައިޒޭޝަން، ޑަބްލިޔު.އެޗް.އޯ. ގެ ތަފާސް ހިސާބުތަކުން ދައްކާ ގޮތުގައި މުޅި ދުނިޔޭގެ އަންހެނުންގެ އާބާދީގެ ދިހަ އިންސައްތަ މީހުން މި މައްސަލައާއި ގުޅުންހުރި ކަންތައްތައް އަންނަނީ ތަހައްމަލު ކުރަމުންނެވެ. އަދި މި މައްސަލައަކީ ރާއްޖޭގައި ވެސް މިހާރު ވަރަށް ގިނަ އަންހެނުންނަށް ދިމާވަމުން އަންނަ މައްސަލައެކެވެ.

ދަރިމައިވުމުގެ މައްސަލަ ތަހައްމަލު ކުރުމުގައި ހުރި ހިތްދަތިކަމާއި، މިކަމުގެ ސަބަބުން ކުރިމަތިލާންޖެހޭ މާލީ ގޮންޖެހުންތަކުގެ ވާހަކަ މިހާރު އަހަރެމެންގެ މުޖުތަމައުގައި ވަރަށް އާންމު ވެއްޖެއެވެ. އަހަރެމެންގެ ކޮންމެވެސް އާއިލާ މީހަކަށް، ނޫންނަމަ ރަހްމަތްތެރިއަކަށް މިފަދަކަމެއް ދިމާވެގެން އުޅޭ އަޑަކީ މިހާރު އާ އަޑެއް ނޫނެވެ. މިކަމުގެ ނަފްސާނީ އަދި މާލީ ގޮންޖެހުންތައް އެނގިފައިހުރި މީހެއްގެ ހައިސިއްޔަތުން، ކުރީގެ މަޝްހޫރު ފިލްމީ ތަރި، މަރިޔަމް ނިޝާ ވަނީ "ނޫން" އަށް މި މަޢުޟޫއާއި ގުޅޭ މުހިންމު ވާހަކައެއް ޙިއްސާކޮށްފައެވެ.

ދަރިމައި ނުވެވިގެން އުޅޭ އަންހެނުންގެ ވާހަކަ އަސާރާއިއެކު ކިޔާ ދެމުން ނިޝާ ބުނީ، އަހަރެމެންގެ ތެރޭގައި މަންމާ އޭ ކިޔާފަ ގޮވާލާ އަޑުއަހާލަން ބޭނުންވެފަ، އެ ނަސީބު ނުލިބިފައިތިބި އެތައް އަންހެނުންނެއް އުޅޭކަމަށެވެ. ނިޝާ ފާހަގަ ކުރި ގޮތުގައި، މިއަދާއި ހަމައަށް އައިއިރު މިކަމުގައި އޮތް އެންމެ ބޮޑު ހިތާމައަކީ، ދަރިމައިވުމުގެ ފަރުވާއަށް ކުރަންޖެހޭ ހޭދަ ބޮޑުއިރު، ގިނަ ދެމަފިރިންނަށް މި ޚަރަދު ކުރެވޭނެ ތަނަވަސްކަން ނެތުމެވެ.

ނިޝާގެ ރަޙްމަތްތެރިއަކަށް މިކަމާއި ގުޅިގެން ކުރިން ދިމާވި ހިތްދަތިކަން ކިޔާދެމުން ބުނީ، އެ ރަޙްމަތެރިޔާ މާބަނޑުވެ، "ޓްވިންސް" އެއް ލިބުނު ނަމަވެސް ދެ ކުދިން އެއްކޮށް ގެއްލުނީ ކަމަށެވެ. ދެން އަނެއްކާ ވެސް ދަރިއެއް ހޯދުމުގެ މަޤްސަދުގައި، އެކަމަށް ފަރުވާ ކުރުމަށް ބޭރު ގައުމަކަށް ދިޔަ ވާހަކަ ކިޔާ ދިނެވެ. ނަމަވެސް އެތާ ގިނަ ދުވަހު މަޑުކުރަން ޖެހުމުން، އަތްމަތި ދަތިވެ އެއްވެސް ޚަރަދެއް ނުކުރެވޭ ހިސާބަށް ހާލަތު ދިއަކަމަށް ނިޝާ ކިޔާދިނެވެ.

ނިޝާ އިތުރަށް ފާހަގަ ކުރިގޮތުން، މިފަދަ ސިއްޙީ ކަމަކާއި ގުޅިގެން ބޮޑު މާލީ ބުރައެއް، އަދި އެކަމާއި ގުޅިގެން ނަފްސާނީ އުނދަގޫތައް ދިމާވާންޖެހޭ ހާލަތްތައް ނައްތާލަންޖެހޭކަން ގަބޫލުކުރީ މިހާރުގެ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙެވެ. އެމް.ޑީ.ޕީ.ގެ މިފަހަރުގެ މެނިފެސްޓޯގައި ދަރިމައިވުމުގެ މައްސަލައަށް ފަރުވާ ކުރުމަށް އާސަންދަ ހަމަޖެހޭނެކަމަށް ހާމަކޮށްފައިވުމީ، މިކަމުގެ ހެއްކެކެވެ.

ކުރިން މި މައްސަލައަށް ފަރުވާ ކުރެވެނީ ހަމައެކަނި ރާއްޖެއިން ބޭރުންކަމަށް ވީ ނަމަވެސް، މި ހިނގާ މެއި މަހުގެ 29 ވަނަ ދުވަހު ޓްރީޓޮޕް ހޮސްޕިޓަލުގައި ވަނީ ފާޓިލިޓީ ސެންޓަރެއް ހުޅުވާފައެވެ. މިކަމަށްޓަކައި ބޭއްވި ޙާއްސަ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވީ، އެ ސެންޓަރާއިއެކު، ދަރިމައިވުމުގެ މައްސަލަ ތަހައްމަލު ކުރަމުންދާ އާއިލާތަކަށް ކޮންމެވެސް ވަރެއްގެ ލުޔެއް ލިބިގެން ދާނެކަމަށެވެ.

"އަޅުގަނޑު ހިތުން، މި މަރުކަޒާ އެކު، އެ ތަކުލީފުތަކަށް ލުޔެއް ލިބޭނެ. އަދި އެތައް ފައިސާއެއް ސަލާމަތްވެސް ކުރެވޭނެ. އަދި ޢާއިލާތަކަށް ވަރަށް ބޮޑު އުފާވެރިކަމެއްވެސް ގެނެސްދޭނެ. މި ޚިދުމަތް ފެށުމުން ޙާޞިލުވާނެ އެންމެ ރަނގަޅު ނަތީޖާއަކީ، ރާއްޖެއިން ބޭރަށް ނުގޮސް، ވަޒީފާއިން ވަކިނުވެ ނުވަތަ ނޯޕޭލީވް ނުނަގައި، އަދި ޢާއިލާގެ ކައިރީގައި ހުރެގެން، ފަރުވާ ހޯދުމުގެ ފުރުޞަތު ލިބުން."

އޭގެ ފަހުން، މިހާރު އެމް.ޑީ.ޕީ.ގެ މެނިފެސްޓޯގައި ހިމެނިގެން، މި ފަރުވާއަށް އާސަންދަ ހަމަޖެހިގެން ދިއުމަކީ ހަމަގައިމުވެސް މިފަދަ ދެމަފިރިންނަށް ލިބޭނެ ވަރަށް ބޮޑު މާލީ އަދި ނަފްސާނީ ލުޔަކަށް ވެގެންދާނެ ކަމެކެވެ.