މާލޭ މީހުންނަށް ގޯތި ދިނުމަށް ހުޅުމާލޭ ފަޅު ހިއްކާނެ ގޮތް ދައްކާލައި މި ހަފްތާގައި ބިން ހިއްކުމުގެ މަސައްކަތް ފަށާނެ ކަމަށް އާބަންކޯއިން ބުނެފި އެވެ. އެއާ އެކު، އާބަންކޯ އިން ވަނީ އެ ސަރަހައްދުގައި އަޅާފައިވާ އުޅަނދުފަހަރު އެ ތަނުން ބޭރުގައި އެޅުމަށް އެ ކުންފުނިން ވަނީ އަނެއްކާވެސް އަންގާފަ އެވެ.

އާރބަންކޯއިން ބުނީ އެ މަސައްކަތް ކުރިއަށްގެންދަނީ ތިންބަޔަކަށް ބަހާލައިގެންކަމަށެވެ. އެގޮތުން ފުރަތަމަ މަސައްކަތް ފަށާނީ ސައިޓް-އޭ ގައި ހިމެނޭ 10 ހެކްޓަރު ހިއްކުމުގެ މަސައްކަތް ކަމަށެވެ. ފުރަތަމަ އުޅަނދުތައް ނެގުމުގެ މަސައްކަތް މިހާރު ފަށާފައިވަނީވެސް އެ ސަރަޙައްދުގައެވެ.

ސައިޓް-ބީގެ 29 ހެކްޓަރާއި، ސައިޓް-ސީ ގެ 24 ހެކްޓަރު ހިމެނޭ ސަރަހައްދުގައި އަމިއްލަ ފަރާތްތަކުން އަޅާފައިވާ އުޅަނދުތައްވެސް ވީހާވެސް އަވަހަށް ނެގުމަށް އާރބަންކޯއިން ވަނީ އެދިފައެވެ. އާރބަންކޯއިން ވަނީ ނަގާ އުޅަނދުތައް ހުޅުމާލެ ބޭރުގައާއި، އަދި ކުޑަގިރި ފަޅާއި ދިޔަނެރު ފަޅުގައިވެސް އެޅޭނެ އިންތިޒާމް މިހާރު ހަމަޖައްސާފައެވެ.

ކުޑަގިރި ފަޅާއި ދިޔަނެރު ފަޅުގައި އުޅަނދުތައް އެޅޭނީ އާރބަންކޯގައި ރަޖިސްޓްރީކޮށްގެންނެވެ. ހުޅުމާލެ ހިއްކަނީ، މިހާރު ސަފާރީތަކާއި އަމިއްލަ މީހުން އުޅަނދުތައް އަޅަން ބޭނުންކުރަމުންދާ ފަޅުގެ ސަރަޙައްދެވެ. އެއީ ކްލަބްމެޑް ރިސޯޓަށް ބޭނުންކުރި ސަރަޙައްދުން ފެށިގެން، ހުޅުމާލޭގައި ހިންގަމުން އަންނަ މޭރީބްރައުން ރެސްޓޯރަންޓް ކުރިމަތިން އޮންނަ ފަޅުގެ ސަރަޙައްދާ ހަމައަށެވެ.

އާރބަންކޯއިން އާންމުކޮށްފައިވާ ކުރެހުމުގައިވާ ގޮތުން، ހުޅުމާލޭގެ ފަޅުން ހިއްކާ ޖުމްލަ 63 ހެކްޓަރުގެ ބިމުގެ މެދަށް ވާ ގޮތަށް އޮއެ ދައުރު ކުރަން ކޯރެއް ކަނޑާނެ އެވެ. އެ ކޯރު ކަނޑަނީ މިހާރު ހުޅުމާލޭގެ ދެ ފިޔަވަހީގެ މެދަށް ވާ ގޮތަށް އޮންނަ ކޯރާ ދިމާވާ ގޮތަށް އެހެން ނަމަވެސް އެއަށް ވުރެ ހަނިކޮށެވެ.

މި މަސައްކަތް ހަވާލުކޮށްފައިވަނީ ލަންކާގެ ކުންފުނި، ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ ޕްރައިވެޓް ލިމިޓެޑް (ސީއެމްސީ)އާއެވެ.