އަންނަ ހޮނިހިރު ދުވަހު ބާއްވާ ރިޔާސީ އިންތިޚާބާއި ގުޅިގެން، އެދުވަހާއި ވިދިގެން އަންނަ އާދީއްތަ ދުވަހަކީ ސަރުކާރު ބަންދު ދުވަހެއް ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހަމަޖައްސަވައިފިއެވެ.

ރިޔާސީ އިންތިޚާބު ބޭއްވުމަށް ހަމަޖެހިފައި ވަނީ، މި ސެޕްޓެމްބަރު މަހުގެ 9ވާ ހޮނިހިރު ދުވަހެވެ. އަދި އެއާ ވިދިގެން އަންނަ 10 ސެޕްޓެމްބަރު 2023ވާ އާދީއްތަ ދުވަސް ރަސްމީ ބަންދު ދުވަހެއްގެ ގޮތުގައި ހަމަޖައްސަވާފައިވާކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުން ނެރުއްވި ދެންނެވުމުގައެވެ.

އެ ދެންނެވުގައި، ވިދާޅުވެފައިވާ ގޮތުގައި، ރައީސުލްޖުމްހޫރިއްޔާ މިގޮތަށް ހަމަޖައްސަވައިދެއްވާފައި ވަނީ ސެޕްޓެންބަރު މަހުގެ 9 ވާ ހޮނިހިރު ދުވަހަކީ، ރިޔާސީ އިންތިޚާބު ބާއްވާ ދުވަސް ކަމަށް ވުމާއެކު، އިންތިޚާބާ ގުޅޭ އެކިއެކި މަސައްކަތްތަކުގައި، ސަރުކާރުގެ ގިނަ ޢަދަދެއްގެ މުވައްޒަފުންނާއި ޢާންމު ރައްޔިތުން ޙަރަކާތްތެރިވާނެތީއާއި، އެ ދުވަހާ ގުޅިގެން، ސެޕްޓެންބަރު މަހުގެ 10 ވަނަ ދުވަހަކީ، ސަރުކާރު ބަންދު ދުވަހެއްގެ ގޮތުގައި ހަމަޖައްސަވައިދެއްވުމަށް، އިލެކްޝަންސް ކޮމިޝަނުން އެދިވަޑައިގެންފައި ވާތީއެވެ.

ރިޔާސީ އިންތިޚާބުގެ ވޯޓުލުން ނިމި، އިންތިޚާބުގެ ނަތީޖާ ސާފުވާން ފަށާނީ، 9 ސެޕްޓެމްބަރު 2023ވާ ހޮނިހޮރު ދުވަހުގެ ރޭގައެވެ. އަދި އިންތިޚާބުގެ ވަގުތީ ނަތީޖާ އިޢުލާނު ކުރެވޭނެ ކަމަށް ބެލެެވެނީ، އެރޭގެ މެންދަމުގެ ވަގުތެއްގައެވެ.

މިއަހަރުގެ ރިޔާސީ އިންތިޚާބުގައި 8 ކެންޑިޑޭޓުން ވާދަކުރައްވާއިރު، 4000 ވުރެ ގިނަ މީހުން އިންތިޚާބާއި ގުޅޭ އެކިއެކި ކަންކަމުގައި ހަރަކާތްތެރިވާނެއެވެ. އޭގެ ތެރެއިން ގިނަ ބަޔަކީ، ދިވެހި ސިވިލްސަރވިސްގެ މުވައްޒަފުންނެވެ.