އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ތާއީދުކުރަން ޓޫރިޒަމް އެމްޕްލޯއީސް އެސޯސިޝަން އޮފް މޯލްޑިވްސް (ޓީމް) އިން ނިންމައިފި އެވެ.

ޓީމުން ނެރުނު ބަޔާނެއްގައި ބުނީ، މިދިޔަ ފަސް އަހަރު އެހެން އެއްވެސް ސަރުކާރަކުން އެ ދާއިރާގެ މުވައްޒަފުންގެ ހައްގުތައް ރައްކާތެރިކޮށް ނުކޮށްދޭ ވަރަށް ކަންކަން ފަހިކޮށްދިން ކަމަށެވެ.

މުވައްޒަފުންގެ ހައްގުތައް ރައްކާތެރިކުރުމުގެ ގޮތުން، ބޭރުގެ ބައިނަލްއަގްވާމީ ޖަމިއްޔާތަކާ ގުޅިގެން ގިނަ މަސައްކަތްތަކެއް ކުރި ކަމަށް އެ ޖަމިއްޔާއިން ވަނީ ބުނެފައެވެ. މިނިމަމްވޭޖު ތަންފީޒުކުމުން ރިސޯޓުތަކުގެ މުވައްޒަފުންގެ މުސާރަ އަށް ބޮޑު ބަދަލެއް އައި ކަމަށާއި ރިސޯޓުތަކުން 10 ޕަސެންޓް ސާވިސް ޗާޖު ދޭން ލާޒިމުކޮށް، އެކަން ކުރާކަން މޮނިޓަ ކުރެވޭނެ ހަރުދަނާ ނިޒާމެއް ގާއިމް ކުރި ކަމަށް ވެސް ޓީމުގެ ބަޔާނުގައި ވެ އެވެ.

އެ ޖަމިއްޔާ އިން ބުނިގޮތުގައި، އުސޫލެއް އަދި ހަމައެއް ނެތި މުވައްޒަފުން ވަކިކުރުން ހުއްޓުވަން ގާނޫނު އިސްލާހު ކުރިކަމަށާއި، ރިސޯޓު މުވައްޒަފުން ބޭނުންވި ގޮތަށް ސްކޫލް ޗުއްޓީ އަށް ސަރުކާރުން ބަދަލު ގެނައި ކަމަށާއި ރިސޯޓު މުވައްޒަފުންގެ މަސައްކަތު ވަގުތު ފިޔަވައި، އެހެން ވަގުތު ތަކުގައި ހުއްދަ ނެތި ރިސޯޓުން ނުކުރެވޭނެ ގޮތަށް ގާނޫނަށް ބަދަލު ގެނެސްދީފައިވަނީވެސް މި ސަރުކާރުންކަމަށެވެ.

އަންނަ ދައުރުގައި ވެސް މުވައްޒަފުންނަށް ރަނގަޅު ގޮތެއް އޮތީ، މިހާރުގެ ވެރިކަން ދަމަހައްޓައިގެން ކަމަށް ޓީމުގެ ގިނަ މެންބަރުން ގަބޫލުކުރާ ކަމަށް އެ ޖަމިއްޔާ އިންވަނީ ބުނެފައެވެ. އެ ޖަމިއްޔާ އިން ބުނީ، އެ ކަންކަން ކޮށްފައިވާ އިރު ރިސޯޓު މުވައްޒަފުންނަށް ހާއްސަ ބޯހިޔާވަހިކަމުގެ ސްކީމެއް ދެން އަންނަ ދައުރެއްގައި، ފަށާނެ ކަމަށް ރައީސް އިބްރާހިމް މުހައްމަދު ސޯލިހު ވައުދުވެވަޑައިގެންފައިވާ ކަމަށެވެ.