ކަސްޓަމްސްގެ އޮފިސަރުންތަކެއް ގޮތްނޭނގޭ ޑޮލަރުތަކެއް ކްލިއަރކުރާކަމަށް ބުނެ ސޯޝަލް މީޑިއާގައި ދަޢުރުވަމުންދާ ވީޑިއޯއިން ފެންނަނީ ބޭންކަކުން އެތެރެކުރި ޑޮލަރުތަކެއް ކަމަށް މޯލްޑިވްސް ކަސްޓަމްސް ސާވިސް (އެމްސީއެސް)ން ބުނެފިއެވެ.

ސޯޝަލް މީޑިއާގައި އިއްޔެ އާއްމުވި ވީޑިއޯއިން ފެންނަނީ ޑޮލަރު އަޅާފައިވާ ފޮއްޓަކުން، އެ ޑޮލަރުތައް ނަގާ ކަސްޓަމްސްގެ މުޢައްޒަފަކު ޗެކް ކުރަމުންދާ މަންޒަރެވެ. އެ ވީޑިއޯ ޕޯސްޓްކޮށް ސޯޝަލް މީޑިއާގައި ހަބަރު ފަތުރާފައިވަނީ، އެ ޑޮލަރަކީ އަވަށްޓެރި ޤައުމަކުން ނުގަވާއިދުން އެތެރެކޮށްފައިވާ ފައިސާކަމަށް ބުނެއެވެ.

މިކަމާއި ގުޅިގެން ކަސްޓަމްސްއިން ނެރުނު ބަޔާނުގައި ވިދާޅުވީ ވީޑިއޯއިން ފެންނަ ޑޮލަރުތަކަކީ އުސޫލުގެ ތެރެއިން، ނަގަންޖެހޭ ހުއްދަތައް ނަގައިގެން ރާއްޖެ އެތެރެކޮށްފައިވާ ފައިސާކަމަށެވެ. އަދި ކަސްޓަމްސްއިން ޑިކްލެއަރކޮށްފައިވަނީވެސް ޢަމަލުކުރަން އޮންނަ އުސޫލުންކަމަށާއި މިއީ އަބަދުވެސް ބޭންކުތަކުން ޢަމަލުކުރަން އަންނަ އުސޫލުކަމަށްވެސް ކަސްޓަމްސްއިން ވިދާޅުވެއެވެ. އެފަދަ ވީޑިއޯތައް އާންމުންނަށް އޮޅޭނެހެން އެކި ގޮތްގޮތަށް ޝާއިއުކުރުމުގެ ކުރިން ކަސްޓަމްސްއިން ވެރިފައިކުރުމަށް އެ އިދާރާއިން ވަނީ އެދިފައެވެ.