ނިމިދިޔަ އެޕްރީލް މަހުގެ ދުވަސްތަކަކީ ރާއްޖެއަށް މި އަހަރު އެންމެ ހޫނު ގަދަވި ދުވަސްތައް ކަމުގައި ކަމާ ގުޅޭ އިދާރާތަކުން ހާމަކޮށްފައި ވެއެވެ. އަދި އެޕްރީލް މަހުގެ 24 ވަނަ ދުވަހަކީ މިހާތަނަށް ރާއްޖޭގައި ރެކޯޑު ކުރެވިފައިވާ އެންމެ ހޫނު ގަދަ ދުވަހެވެ. ސްޓެލްކޯއިން ހާމަކޮށްފައިވާ ގޮތުގައި އެދުވަހަކީ ސްޓެލްކޯއަށް ކަރަންޓު އުފެއްދުމަށް ލިބިފައިވާ ހުރިހާ ވަސީލަތްތަކެއް ބޭނުންކުރަން ޖެހުނު ދުވަހެކެވެ.  

އެޕްރީލް މަހު ޖައްވު ހޫނުވުމުގެ ސަބަބުން ގޭބިސީތަކުގައި ކަރަންޓު ބޭނުންކުރި މިންވަރު, ހާއްސަކޮށް ރޭގަނޑު ގަޑީގައި އިތުރުވެ, ސްޓެލްކޯއިން ކަރަންޓު އުފެއްދި މިންވަރު ވެސް ވަނީ އިތުރުވެފައެވެ. އަދި ހޫނު މޫސުމާ ރޯދަ މަހާ ދިމާވުމަކީ ކަރަންޓު ބޭނުންކުރާ މިންވަރު އިތުރު ވެގެން ގޮސްފައިވާ ދެވަނަ ސަބަބުކަމަށް ސްޓެލްކޯއިން ފާހަގަ ކުރެއެވެ. މި ސަބަބުތަކާއި ހެދި, ކަރަންޓު ބޭނުން ކުރުމުގައި އިތުރަށް ސަމާލުވެ, ކަރަންޓު އިސްރާފުކުރުން މަދުކޮށް އިގްތިސާދު ކުރެވޭނެ ގޮތަކަށް ރާވާ, ކަރަންޓު ޚަރަދު ކުޑަކުރުމަށް އިތުރަށް މަސައްކަތް ކުރުމަށް ސްޓެލްކޯއިން ވަނީ ތަކުރާރުކޮށް އިލްތިމާސް ކޮށްފައެވެ. 

އެހެންނަމަވެސް އެޕްރީލް މަހުގެ ކަރަންޓު ބިލު ލިބުނު އިރު, ކުރީ މަސްތަކަށް ވުރެއް ބިލު ބޮޑުވެފައި ވުމުން ގިނަ ބަޔަކަށް ހާސްކަން ލިބުނެވެ. އަދި ބިލު ހިސާބު ކޮށްފައިވާ ގޮތާއިމެދު ބައެއް ފަރާތްތަކުން ސުވާލު ވެސް އުފެއްދިއެވެ. ނަމަވެސް ބިލް ހިސާބު ކޮށްފައިވާ ގޮތް އަމިއްލައަށް ބަލާލެވޭނެ މަގު ތަނަވަސްވެފައި ވުމީ, މި ޝައްކުތަކާއި ވަހުމްތައް ހިތުން ފިލުވާލަން ފަހި ވެފައިވާ ފުރުސަތެކެވެ. އަދި ކަރަންޓު ބޭނުން ކުރެވޭ މިންވަރު ދޭތެރެ ދޭތެރެއިން ބަލާލެވެން ހުރުމަކީ ވެސް, ކަރަންޓު ބޭނުން ކުރުމުގައި އެ މަހެއްގައި ސަމާލުވާން ޖެހޭ ހިސާބަށް ގޮސްފިކަން ނުވަތަ ނޫންކަން ހަނދާންކޮށްދޭނެ ރަނގަބީލެކެވެ. 

Advertisement

ކަރަންޓު ބޭނުން ކުރެވޭ މިންވަރު އަމިއްލައަށް ހިސާބު ކުރަން ބޭނުންނަމަ, ސްޓެލްކޯ މޯބައިލް އެޕްލިކޭޝަނުން މިކަން ވާނެއެވެ. އަވަހަށް ޑައުންލޯޑު ކޮށްލާށެވެ. ކަރަންޓު ބިލު އަމިއްލައަށް ހިސާބުކޮށްލުމަށް, މޯބައިލް އެޕް ހުޅުވާލުމަށްފަހު “ބިލް ކަލްކިއުލޭޓަރ” އަށް ފިތާލާށެވެ. ދެން ކުރީ މަހުގެ ރީޑިންގ އާއި މި މަހުގެ ރީޑިންގ އަދި ރީޑިންގ ނެގި މުއްދަތު ޖަހާލުމަށްފަހު “ކަލްކިއުލޭޓް” އަށް ފިއްތާލާށެވެ. އޭރުން ބިލްގެ ޖުމްލަ ޔަގީންކޮށްލެވޭނެއެވެ. 

މި މަހުގެ މިހާތަނަށް ކަރަންޓު ބޭނުން ކުރެވުނުވަރު ބަލަން ބޭނުންނަމަ އެކަން ވެސް ކުރެވޭނެއެވެ. މި މަހުގެ މިހާތަނަށް އައިއިރު ކަރަންޓު ބޭނުން ކުރެވުނު މިންވަރު ބަލާލުމަށްޓަކައި އެންމެ ފަހުން ނެގި ރީޑިންގ ޖަހާލުމަށްފަހު މީޓަރ ކައިރިޔަށް ދާށެވެ. އަދި އެއަށްފަހު މިހާރުގެ ރީޑިންގ ޖަހާލުމަށްފަހު, އެންމެ ފަހުން ރީޑިންގ ނެގުމާއި ދޭތެރޭ ފާއިތުވެފައިވާ ދުވަސްތަކުގެ އަދަދު ޖަހާލާށެވެ. މިސާލަކަށް މިއަދު މިއީ މެއި 5 ނަމަ އަދި އެންމެ ފަހުން ރީޑިން ނެގީ މިދިޔަ މަހު 30 ގައި ނަމަ, ކަރަންޓު ބޭނުންކުރި މުއްދަތަށް 5 ދުވަސް ޖެހުމަށްފަހު “ކަލްކިއުލޭޓް” އަށް ފިތާލުމުން މިހާރު ކަރަންޓު ބޭނުން ކުރެވުނު މިންވަރު އެނގޭނެއެވެ.

އާއްމު ދިރިއުޅުމަށް ގިނަ ގޭގޭގައި ބޭނުންކުރާ ކަރަންޓު ވަސީލަތްތަކުގެ ތެރެއިން އޭ.ސީ. އަކީ އެންމެ ގިނައިން ކަރަންޓު ބޭނުންކުރާ އެންމެ ޚަރަދުބޮޑު އެއް ވަސީލަތެވެ. އޭ.ސީ. ބޭނުންކުރާ ނިސްބަތް މަދުކުރުމަކީ ކަރަންޓު ބިލް ކުޑަކުރުމަށް އެޅިދާނެ މުހިއްމު ފިޔަވަޅެކެވެ. މީގެ އިތުރުން އޭ.ސީ. އިން ކަރަންޓު ބޭނުންކުރާ މިންވަރު މަދުކުރުމަށްޓަކައި, އޭ.ސީގެ ފިނިހޫނުމިން 25°C  އަށްވުރެ ދަށްނުވާނެހެން ބަހައްޓާށެވެ. އަދި އޭ.ސީ. ގެ ފިލްޓަރ ގަވައިދުން ސާފުކުރުމަކީ އޭ.ސީ. އިން ހަކަތަ ބޭނުންކުރާ މިންވަރު މަދުކޮށްދޭނެ ކަމެކެވެ. 

މީގެ އިތުރުން ގޭގައި ބޭނުންކުރާ ދޮންނަ-މެޝިން، އައިސް އަލަމާރި، ޓީ.ވީ ފަދަ ކަރަންޓު ވަސީލަތްތައް ގަންނަ އިރު، އެނަރޖީ އެފިޝަންޓް މޮޑެލް އިޚްތިޔާރުކުރުމުން ކަރަންޓު ބޭނުންކުރާ މިންވަރު ކުޑަކުރެވި، ކަރަންޓަށް ކުރާ ހޭދަ ކުޑަކުރެވިދާނެއެވެ.