ރާއްޖޭގައި 4000 ސޯޝަލް ހައުސިންގ ޔުނިޓް ތަރައްޤީކުރުމަށް ބަޔަކާއި ޙަވާލުކޮށްފިއެވެ. ފަހި ދިރިއުޅުން ކޯޕަރޭޝަންގެ ފަރާތުން މި މަސައްކަތް ޙަވާލުކޮށްފައިވަނީ އެމެރިކާގެ ސްޓްރަކްޗާސް އަންލިމިޓެޑް ނަމަކަށް ކިޔާ ކުންފުންޏަކާއެވެ.

މި އެއްބަސްވުމުގައި އެފް.ޑީ.ސީގެ ފަރާތުން ސޮއިކުރެއްވީ، އެކޯޕަރޭޝަންގެ މެނޭޖިންގ ޑިރެކްޓަރ ސަލްފިޔާ އަންވަރެވެ. އަދި ސްޓްރަކްޗާސް އަންލިމިޓަޑްގެ ފަރާތުން ސޮއިކުރެއްވީ އެ ކުންފުނީގެ ޗެއަރމަން ކަރީމް ޖަމަލް އަބްދުސް-ސަލާމެވެ.

މިއެއްބަސްވުމުގެ ދަށުން، ރާއްޖޭގެ 5 ސަރަހައްދެއްގައި ސޯޝަލް ހައުސިންގ ޔުނިޓްތައް ތަރައްޤީކުރުމަށް ވަނީ އެއްބަސްވެފައެވެ. ސޯސަލް ހައުސިން ތަރައްޤީކުރާ ސަރަހައްދުތައް:

* އައްޑޫ ސިޓީ - 750 ހައުސިންގ ޔުނިޓް

* ގދ. ތިނަދޫ - 500 ހައުސިންގ ޔުނިޓް

* ލ. ގަން - 1000 ހައުސިންގ ޔުނިޓް

* ކުޅުދުއްފުށި ސިޓީ - 1000 ހައުސިންގ ޔުނިޓް

* ގްރޭޓަރ މާލެ ސަރަޙައްދު - 750 ހައުސިންގ ޔުނިޓް

މި މަޝްރޫޢުގެ ޖުމްލަ އަގަކީ 249 މިލިއަން އެމެރިކާ ޑޮލަރެވެ. މިއެއްބަސްވުމުގެ ދަށުން ތަރައްޤީކުރާ ހައުންސިންގ ޔުނިޓްތައް ނިންމުމަށް ހަމަޖެހިފައިވަނީ މަޝްރޫއުގެ އަމަލީ މަސައްކަތް ފަށާތާ 36 މަސް ދުވަހުގެ ތެރޭގައެވެ.

ރާއްޖެއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކޮށްދިނުމަށް ގްރޭޓަރ މާލޭ ސަރަހައްދާއި، އަތޮޅުތަކުގައި މިވަގުތުވެސް ސަރުކާރުން ގެންދަވަނީ ހައުސިންގ މަޝްރޫޢުތައް ހިންގަވަމުންނެވެ. މީގެ ތެރޭގައި ސޯޝަލް ހައުސިންގގެގޮތުގައި ފްލެޓާއި ރޯ-ހައުސް ތަރައްޤީކުރުމުގެ މަޝްރޫޢުތައް ހިމެނެއެވެ.