އިންޑިއާގެ ގައުމީ އެއާލައިން، އެއާ އިންޑިއާ އިން ރާއްޖެއަށް ދަތުރުތައް ފަށަން ތައްޔާރުވެއްޖެއެވެ. މި ދަތުރުތައް ކުރާނީ ބެންގަލޫރު އަދި މުމްބާއީއިން ރާއްޖެއަށެވެ.

އެއާ އިންޑިއާގެ ރާއްޖޭގެ އެެޖެންޓް، ވިލާ ޓެރަވަލްސް އިން އާންމުކޮށްފައިވާ ގޮތުގައި، އެއާ އިންޑިއާ އިން ރާއްޖެއަށް އުދުހެން ފަށާނީ 30 އޮކްޓޯބަރުގަ އެވެ. އެއާ އިންޑިއާ އިން މީގެ ކުރީ އަހަރުތަކުގައި ވެސް ފިނި މޫސުމާ ދިމާކޮށް ރާއްޖެއަށް ސީދާ ދަތުރުތައް ކުރި އެވެ. 

ޓޫރިޒަމް މިނިސްޓްރީގެ ހިސާބުތައް ދައްކާ ގޮތުން، މި މަހުގެ 26 ވަނަ ދުވަހާ ހަމައަށް އިންޑިއާ އިން 133،495 ފަތުރުވެރިން ރާއްޖެ އައިސްފައިވެ އެވެ. އިންޑިއާ އަކީ މިހާރު ދެ ވަނައަށް އެންމެ ގިނަ ފަތުރުވެރިން ރާއްޖެ އަންނަ ގައުމެކެވެ. މިދިޔަ އަހަރު އެ ޤައުމު އޮތީ 1 ވަނައިގައެވެ.

Advertisement

އިންޑިއާއަކީ ދިވެހިންވެސް ގިނަ އަދަދަކަށް ދަތުރުކުރާ ޤައުމެކެވެ. އެހެންކަމުން މި ދަތުރުތަކާއިއެކު ދިވެހިންނަށްވެސް ބޮޑު ފަސޭހައެއް ލިބިގެންދާނެއެވެ.

މި ވަގުތު ރާއްޖެ އާއި އިންޑިއާއާ ދެމެދު ސީދާ ދަތުރުކުރަނީ އިންޑިގޯ އާއި މޯލްޑިވިއަން އަދި ވިސްތާރާ އިންނެވެ. މީގެ އިތުރުން މޯލްޑިވިއަން އިން ވެސް 30 އޮކްޓޯބަރުން ފެށިގެން އިންޑިއާގެ ބެންގަލޫރަށް ސީދާ ދަތުރުތައް ފަށަން ތާވަލުކޮށްފައެވެ.