މިއަހަރުގެ މިހާތަނަށް ރާއްޖެއަށް 1.2 މިލިއަން ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ. މިއީ ފާއިތުވި 2 އަހަރާއި އަޅާބަލާއިރުވެސް ބޮޑު ކުރިއެރުމެކެވެ.

ސަރުކާރުން މިއަހަރު އަމާޒުހިފާފައިވަނީ ރާއްޖެއަށް 1.9 މިލިއަން ފަތުރުވެރިން ގެނައުމަށެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިމަހުގެ 26 ވަނަ ދުވަހުގެ ނިޔަލަށް ރާއްޖެއަށް 1،212،618 ފަތުރުވެރިން ވަނީ އައިސްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު %14 އިތުރު އަދަދެކެވެ.

ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 5000 އަށްވުރެ ގިނަ ފަތުރުވެރިން އާދެއެވެ. ވަކިވަކި މަސްމަހު ރާއްޖެ އައި ފަތުރުވެރިންގެ އަދަދު

- ޖަނަވަރީ - 172،499 ފަތުރުވެރިން

- ފެބްރުއަރީ - 177،915 ފަތުރުވެރިން

- މާރޗް - 173،514 ފަތުރުވެރިން

- އޭޕްރީލް - 164،357 ފަތުރުވެރިން

- މެއި - 120،959 ފަތުރުވެރިން

- ޖޫން - 120،363 ފަތުރުވެރިން

- ޖުލައި - 145،620 ފަތުރުވެރިން

- އޮގަސްޓް (26 ގެ ނިޔަލަށް) - 137،391 ފަތުރުވެރިން

ރާއްޖެއަށް އެންމެ ގިނައިން ފަތުރުވެރިން އަންނަ 5 ޤައުމު:

- ރަޝިއާ - 143،189 ފަތުރުވެރިން

- އިންޑިއާ - 133،495 ފަތުރުވެރިން

- ޗައިނާ - 118،548 ފަތުރުވެރިން

- އިނގިރޭސިވިލާތް - 99،720 ފަތުރުވެރިން

- ޖަރުމަނުވިލާތް - 79،723 ފަތުރުވެރިން

ރާއްޖޭގައި މިވަގުތު ފަތުރުވެރިންނަށް ހިދުމަތް ދިނުމަށް 1259 ތަނެއް ވަނީ ހުޅުވާފައެވެ. މީގެތެރޭގައި ރިސޯޓް، ހޮޓެލް، ގެސްޓްހައުސް އަދި ސަފާރީތައް ހިމެނެއެވެ. އެއީ މުޅި ޖުމްލަ 61،482 އެނދެވެ.