Advertisement
އަހަރެމެންނާއެކު: މަސްތުވާތަކެއްޗާއި ދެކޮޅަށް ރާއްޖޭގައި ކުރިއަށްގެންދާ ފުރަތަމަ އެކްސްޕޯ
މަސްތުވާތަކެއްޗާއި ދެކޮޅަށް ރާއްޖޭގައި ކުރިއަށްގެންދާ ފުރަތަމަ އެކްސްޕޯ "އަހަރެމެންނާއެކު" އެކްސްޕޯ ފަށައިފިއެވެ. މި އެކްސްޕޯ ފައްޓަވައިދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމްއެވެ.
މިއީ ނެޝަނަލް ޑްރަގް އެޖެންސީއާއި، ކަމާއި ގުޅުންހުރި ބޭރު ޖަމިއްޔާތަކާއި ރާއްޖޭގެ އިދާރާތައް ގުޅިގެން ކުރިއަށްގެންދާ އެކްސްޕޯއެކެވެ. އެކްސްޕޯ ކުރިއަށްދަނީ ހުޅުމާލެ ރުއްގަނޑު އެކެއް ސަރަޙައްދުގައެވެ.
އެކްސްޕޯ ފައްޓަވައިދެއްވާ ވާހަކަފުޅުދައްވަމުން ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވީ، މަސްތުވާތަކެތީގެ ހިތާމަ ތަޙައްމަލުކުރަން ނުޖެހޭ އާއިލާއެއް ރާއްޖޭގައި މަދުވާނެކަމަށެވެ. މިކަަން ހައްލުކުުރުމަށް އިދާރާތަކާއި މުޖުމަޢުގެ އެއްބާރުލުން ބޭނުންވާނެކަމަށް ނައިބު ރައީސް ވިދާޅުވިއެވެ.
މިފަދަ އެކްސްޕޯއެއް ބޭއްވުމުގެ އެންމެ ބޮޑު ބޭނުމަކީ މިކަމާމެދު ސިއްޙީ ނަޒަރަކުން މުޖުތަމަޢު ހޭލުންތެރިކުރުންކަމަށް ނޭޝަނަލް ޑްރަގް އެޖެންސީން ވިދާޅުވެއެވެ. މިއީ ފަރުވާ ބޭނުންވާ މައްސަލައެއްކަމާއި، އެކަމުގައި މުއައްސަސާތަކާއި މުޖުތަމަޢުގެ އެހީތެރިކަމުގެ މުހިންމުކަން ބުނެދިނުމަކީވެސް މިއެކްސްޕޯ ބޭއްވުމުގެ މަޤްސަދެއްކަމަށް އެ އިދާރާއިން ވަނީ ބުނެފައެވެ.
މި އެކްސްޕޯގެ ތެރެއިން ޕެނަލް ޑިސްކަޝަންތަކާއި، އިންފޮމޭޝަން ސްޓޯލް އަދި ތަފާރު ގޭމްތަކާއި ހަރަކާތްތަކުގެ ތެރެއިން މަޢުލޫމާތު ފޯރުކޮށްދިނުން ކުރިއަށްދާނެއެވެ.
