ނ. މާފަރުގައި ތަރައްޤީކުރާ ކަސްޓަމްސްގެ އޮފީސް ޢިމާރާތުގެ ބިންގާ އަޅައިފިއެވެ. މި މަސައްކަތަކީ ރީޖަނަލް ކަސްޓަމްސްގެ ޚިދުމަތްތައްވެސް ލާމަރުކަޒުކޮށް އަތޮޅުތަކުގައި ފުޅާކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން ކުރާ މަސައްކަތެކެވެ.

ކަސްޓަމްސްގެ އޮފީސް އިމާރާތުގެ ބިންގާ އަޅުއްވާ ދެއްވީ ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފާއި، ރައްޔިތުންގެ މަޖިލީހުގެ މަނަދޫ ދާއިރާގެ މެންބަރު އަޙްމަދު ހާރޫން އަދި ޑެޕިއުޓީ ކޮމިޝަނަރ އޮފް ކަސްޓަމްސް މަޙްމޫދު ރިޔާޟްއެވެ.

މި ރަސްމިއްޔާތުގައި ވާހަކަ ދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް ޢަބްދުﷲ ޝަރީފް ވިދާޅުވީ، މި އޮފީސް ވެގެންދާނީ ކަސްޓަމްސްއިން ފޯރުކޮށްދޭން ހިދުމަތްތައް ފޯރުކޮށްދިނުމަށް މި ސަރަޙައްދުގެ މުހިންމު އެއް ބިނާކަމަށެއެވެ. މި އިމާރާތުގެ މަސައްކަތް ނިމި ބޭނުންކުރަން ފެށުމުން އުތުރުގެ އަތޮޅުތަކުގެ ވިޔަފާރިވެރިންނާއި އާންމު ރައްޔިތުންނަށް ކަސްޓަމްސްގެ ފަރާތުން ފޯރުކޮށްދޭ ޚިދުމަތްތައް ހަރުދަނާކޮށް ފުޅާކުރުމަށް މަގުފަހިވެގެންދާނެކަމަށް އޭނާ ވިދާޅުވިއެވެ.

މާފަރުގެ ކަސްޓަމްސް އޮފީހަކީ 6557 އަކަފޫޓުގެ ޖާގައިގެ އިމާރާތެކެވެ. މި އިމާރާތުގައި އޮފީސް ސްޕޭސްއެއްގެ އިތުރުން އެކަމަޑޭޝަން ބްލޮކެއް ހިމެނެއެވެ. 8.66 މިލިޔަން ރުފިޔާ ފިއުޗާރ ހޯމް ޕްރައިވެޓް ލިމިޓެޑް މި ޢިމާރާތުގެ މަސައްކަތް ހަވާލުކޮށްފައިވަނީ 540 ދުވަސްތަރޭ މަސައްކަތް ނިންމާ ގޮތަށެއެވެ.  

ކަސްޓަމްސްގެ ޚިދުމަތް ފުޅާކުރުމަށްތަކައި ނ. މާފަރުގައި ކަސްޓަމްސްގެ އޮފީސް އިމާރާތެއް ތަރައްޤީކުރުމަށް ފިއުޗާރ ހޯމް ޕްރައިވެޓް ލިމިޓެޑް ހަވާލު ކުރީ 18 ޖުލައި 2023 ގައެވެ.