އިންޑިއަން ސްޕޭސް ރިސާޗް އޮގަނައިޒޭޝަން، (އިސްރޯ)ގެ ޗަންދްރަޔާން-3 ޕްރޮޖެކްޓްގެ ދަށުން ހަނދަށް ފޮނުވި އުޅަނދު މިއަދު ހަވީރު، ހަނދުގައި ޖެއްސުމާއިއެކު، ޖައްވީ ވާދަވެރިކަމުގައި ކާމިޔާބީ ހޯދައި އިންޑިއާ ތާރީޚުގެ ތެރެއަށް ވަދެއްޖެއެެވެ.

ހަނދަށް ކާމިޔާބު ކަމާއެކު އުޅަނދެއް ފޮނުވުމަށް އިންޑިއާއި މީގެ ކުރިން ދެފަހަރު މަސައްކަތްކޮށް ނާކާމިޔާބުވުމަށް ފަހުގައި މިފަހަރުގެ މިޝަންއަށް މުޅި އިންޑިޔާވެސް އަދި ދުނިޔޭގެ ސަމާލުކަންވެސް އޮތީ ލިބިފައެވެ.

ޗަންދްރަޔާން-3 ހަނދަން ކުރާ ދަތުރު ފަށާފައި ވަނީ، ހުސްވި ޖުލައި މަހުގެ 14 ވަނަ ދުވަހުގައެވެ. މި މިޝަންގައި އިންޑިއާއިން އަމާޒު ހިފާފައި އޮތީ މީގެ ކުރިން އެއްވެސް ޤައުމަކުން ގޮސްފައި ނުވާ ހަނދުގެ ދެކުނު ތަނޑިއަށް އުޅަނދެއް ފޮނުވާށެވެ. މިއީ ހަނދުގެ ދައުރުވުމުގައި ދުނިޔެއާ ދުރުގައިވާ ފަޅިއެވެ. މީގެ އިތުރުން ހަނދުގެ ދެކުނު ތަނޑިއަށް ޖައްވީ އުޅަނދެއް ޖެއްސުމަށް، ރަޝިއާއިން ކުރި މަސައްކަތް ނާކާމިޔާބުވެ ލޫނާ-25 ހަނދަށް ވެއްޓި ހަލާކުވުމާއި ގުޅިގެންވެސް އިންޑިއާގެ މިޝަންއަށް ލިބުނު ސަމާލުކަން ބޮޑުވެގެން ދިޔައެވެ. ރަޝިޔާއިން މަސައްކަތް ކުރަމުން ދިޔައީ، ޗަންދްރަޔާން-3 އަށްވުރެ ކުރިން، ލޫނާ-25 ހަނދުގެ ދެކުނު ތަނޑީގައި ޖެއްސުމަށެވެ.

ޗަންދްރަޔާން 3 ހަނދުގައި ޖެއްސީ އިންޑިއާގަޑިން މިއަދު 18:02 ހާއިރުގައެެވެ. އިސްރޯއިން ވަނީ، މިވަގުތު ވަރަށް ޚާއްޞަގޮތެއްގައި ފާހަގަކޮށްފައެވެ. އަދި ޗަންދުރަޔާން 3 ހަނދުގައި ޖެއްސުމާއިއެކު އިންޑިއާގެ ބޮޑުވަޒީރު ނަރެންދުރަ މޯދީ ވަނީ، މި މުނާޞަބަތު ފާހަގަ ކުރެއްވުމުގައި ގޮތުން، ޤައުމާއި މުޚާތަބު ކުރައްވާފައެވެ. އަދި މިއީ އިންޑިއާއަށް ހޯދުނު ތާރީޚީ މުހިއްމު ކާމިޔާބެއްކަން ފާހަގަކުރައްވައި، އިންޑިއާގެ ކުރިމަގަށް ހޯދުނު ވަރަށް މުހިއްމު ކާމިޔާބީއެއް ކަމުގައި ވިދާޅުވެފައެވެ.

އިންޑިއާގެ ޗަންދްރިޔާން-3 މިޝަންގެ މައިގަނޑު މަގުޞަދަކީ، ހަނދުގެ ދެކުނުތަނޑި ދިރާސާކޮށް، ހަނދުގެ ދެކުނުތަނޑީގައި ގަނޑުފެނާއި އެހެން މިނެރަލްތައް ހުރިތޯ ދެނެގަތުމެވެ.