"ޕްރައިވެޓް ހައުސިންގ އިންފޮމޭޝަން ޕޯޓަލް" ގެ ނަމުގައި ހުޅުމާލޭގައި އަމިއްލަ ކުންފުނިތަކުން ހިންގާ ހައުސިންގ މަޝްރޫޢުތަކުގެ މަޢުލޫމާތު ފަސޭހައިން ބަލައިލެވޭ ޕޯޓަލެއް އާރބަންކޯއިން އިފްތިތާޙުކޮށްފިއެވެ. މި ޕޯޓަލް އިފްތިތާޙުކޮށްފައި ވަނީ ވިނަރެސް ފްލެޓުތަކުގެ ތަޅުދަނޑި ހަވާލުކުރަން ބޭއްވި ރަސްމިއްޔާތުގެ ތެރެއިންނެވެ.

މި ޕޯޓަލުން ހުޅުމާލޭގައި ކުރިއަށްގެންދާ މަޝްރޫޢުތައް ކުރިއަށްދާގޮތް ވަގުތުން ބަލާލެވޭނެއެވެ. އަދި އެޕާޓްމަންޓެއް ގަންނަން ލިބޭތޯއާއި އެޕާޓްމަންޓުގެ ސައިޒް އެނގޭނެހެން މުހިންމު މަޢޫލޫމާތުތައް މި ޕޯޓަލްގައި ފެންނަން ހުންނާނެއެވެ.

މި ޕޯޓަލްގެ އެންމެ ބޮޑު އަމާޒަކީ އަމިއްލަ ކުންފުނިތަކުން ހިންގާ މަޝްރޫޢުތަކުގެ ސައްހަކަން ކަށަވަރުކޮށް، މަޝްރޫޢުތަކާ ބެހޭ މުހިންމު މައުލޫމާތު ބަލައިލެވޭނެ ފަސޭހަގޮތެއް ހަމަޖައްސައިދިނުންކަމަށް އާބަންކޯއިން ބުނެއެވެ. މި ޕޯޓަލަށް ވަދެވޭނީ އީފާސް މެދުވެރިކޮށެވެ.

މި ޕޯޓަލާއި ގުޅޭގޮތުން އެޗް.ޑީ.ސީގެ މެނޭޖިން ޑިރެކްޓަރ އަޙްމަދު އާތިފް ވިދާޅުވީ، މި ޕޯޓަލް ތައާރަފްކުރުމުގެ ބޭނުމަކީ ބައެއް މަޝްރޫއުތަކުން އެޕާޓްމަންޓް ގަންނަ ފަރާތްތަކަށް ލިބެންޖެހޭ މަޢުލޫމާތާއި ޙައްޤުތައް ނުލިބުން ފަދަ މައްސަލަތައް ކުރިމަތިވާތީ ކަމަށެވެ. އަދި ޕޯޓަލުގައި ލިބެން ހުންނަ މަޢުލޫމާތު ކޮންމެ މަހަކު އެއްފަހަރު އަޕްޑޭޓްކުރަމުންދާނެކަމަށް އާޠިފް ވިދާޅުވިއެވެ.