އަންގާރަ ދުވަހުގެ ރޭ ގަލޮޅު ދަނޑުގައި ކުޅުނު ޕްރެޒިޓެންޓްސް ކަޕްގެ ފައިނަލް މެޗުގައި ކްލަބް އީގަލްސް ބަލިކޮށް, މާޒިޔާ ސްޕޯޓްސް އެންޑް ރެކްރިއޭޝަން ކްލަބުން މި މުބާރާތް ދެވަނަ ފަހަރަށް ކާމިޔާބު ކޮށްފިއެވެ. މިއީ މާޒިޔާ އިން ޕްރެޒިޓެންޓްސް ކަޕްގެ ފައިނަލުގައި ކުޅުނު ހަތަރު ވަނަ ފަހަރެވެ.

ފައިނަލުގައި އީގަލްގެ މައްޗަށް މާޒިޔާ ކުރި ހޯދީ 2-0 ގެ ނަތީޖާއަކުންނެވެ. އީގަލްސްއިން ފުރަތަމަ ހާފުގައި އެފެއްދި ގިނަ ހަމަލާތަކެއް މާޒިޔާގެ ކީފަރު, މުޙައްމަދު ފައިސަލް ވަނީ މަތަކޮށްފައެވެ. މާޒިޔާގެ ފުރަތަމަ ގޯލު ކާމިޔާބުކުރީ ފުރަތަމަ ހާފުގެ އިތުރު ވަގުތުގައި އިބްރާހިމް އައިސަމްއެވެ. އައިސަމް މި ގޯލު ކާމިޔާބުކުރީ ނާއިޒު ހަސަން (ދާދު) ނެގި ހުރަހަކުން އޭރިއާ ތެރޭގައި ހުރެ އެއް ފަހަރުން ބޯޅަ ފޮނުވާލައިގެނެވެ.

މާޒިޔާއަށް ލީޑު ފުޅާ ކުރުމަށް ދެވަނަ ހާފުގައި ލިބުނު ފުރުސަތުތައް ބޭކާރުވެފައި ވަނިކޮށް, އެ ޓީމަށް ދެވަނަ ގޯލެއް ކާމިޔާބު ކުރެވުނީ ދެވަނަ ހާފުގެ އިތުރު ވަގުތުގައެވެ. މި ގޯލު ވެސް އެ ޓީމަށް ކާމިޔާބު ކޮށްދިނީ އައިސަމްއެވެ. މެޗު ބަދަލުކޮށްލި ދެ ގޯލާއި އެކު, މެޗުގެ މޮޅު ކުޅުންތެރިޔާއަށް ވެސް ހޮވުނީ އައިސަމްއެވެ.

Advertisement

މިއީ އީގަލްސް އިން މި މުބާރާތުގެ ފައިނަލުގައި ކުޅުނު ތިންވަނަ ފަހަރެވެ. އެންމެ ފުރަތަމަ 2014 ވަނަ އަހަރުގެ ފައިނަލުގައި ނިއުރޭޑިއަންޓް ސްޕޯޓްސް ކްލަބްއާއި ދެކޮޅަށް ކުޅުނު މެޗުގެ 90 މިނެޓު ކުޅުނު އިރު, އެއްވެސް ޓީމަކަށް ގޯލެއް ކާމިޔާބެއް ނުކުރެވުނެވެ. އެ ފަހަރު އީގަލްސް ބަލިވީ "އެކްސްޓްރާ ޓައިމް" ގައެވެ. ނަމަވެސް ޓީ. ސީ. ސްޕޯޓްސް ބަލިކޮށް އީގަލްސް އިން ވަނީ މި މުބާރާތުގެ ތަށި 2016 ވަނަ އަހަރު އުފުލާލާފައެވެ.

މާޒިޔާ އިން ޕްރެޒިޓެންޓްސް ކަޕްގެ ފައިނަލުގައި އެންމެ ފުރަތަމަ ކުޅުނީ 2013 ވަނަ އަހަރުއެވެ. އެއީ ނިއުރޭޑިއަންޓް އާއި ދެކޮޅަށެވެ. އެ މެޗު ނިއުރޭޑިއަންޓުން ކާމިޔާބުކުރީ 4-2 ގެ ނަތީޖާއަކުންނެވެ. ނަމަވެސް މާޒިޔާ އިން ވަނީ 2015 ވަނަ އަހަރު 3-1 ގެ ނަތީޖާއަކުން ނިއުރޭޑިއަންޓް ބަލިކޮށް ޕްރެޒިޓެންޓްސް ކަޕްގެ ތަށި އުފުލާލާފައެވެ. މި މުބާރާތުގެ ފައިނަލުގައި ދެން މާޒިޔާ ކުޅުނީ 2021-2022 ސީޒަނުގައެވެ. އެފަހަރު މާޒިޔާ ބަލިވީ ކްލަބް ވެލެންސިއާ އާއި ވާދަކޮށެވެ.