ޗެމްޕިއަންސް ލީގުގެ ކުއާޓާފައިލް ފުރަތަމަ ލެގުގައި މެންޗެސްޓަރ ސިޓީ އިން ބޮޑު ތަފާތަކުން ޖަރުމަންގެ ޗެމްޕިއަން, ބެޔާން މިއުނިކް ބަލިކުރި މެޗުގައި ގޯލު ޖަހައި, އިންގްލިޝް ޕްރިމިއަރ ލީގުގެ އެއް ސީޒަނެއްގައި އެންމެ ގިނަ ގޯލު ޖެހި ކުޅުންތެރިޔާގެ ރިކޯޑް އެޓީމުގެ ޒުވާން ފޯވާޑް, ނޯވޭގެ އަރލިންގ ހާލަންޑް މުގުރާލައިފިއެވެ. ބެޔާން މިއުނިކް ކޮޅަށް ޖެހި ގޯލާއި އެކު, ޖުމްލަ 45 ގޯލު ހާލަންޑް ވަނީ 2022/23 ސީޒަނުގައި ކާމިޔާބު ކޮށްފައެވެ. 

މި ރެކޯޑް ކުރިން އޮތީ ލިވަރޕޫލްއަށް ކުޅެމުން އަންނަ މިސްރުގެ މުޙައްމަދު ޞަލާހް އަދި ކުރިން މެންޗެސްޓަރ ޔުނައިޓެޑަށް ކުޅުނު ނެދަލޭންޑްސްގެ ރޫޑް ވެން ނިސްޓެލްރޯއީ އަތުގައެވެ. ވެން ނިސްޓެލްރޯއީ މި ރެކޯޑް 2002/03 ސީޒަނުގައި ހެދި އިރު, ޞަލާހް މި ރެކޯޑާއި ހަމަކުރީ 2017/18 ސީޒަނުގައެވެ. އެއީ އިޓަލީގެ އޭ. އެސް. ރޯމާ އިން ލިވަޕޫލަށް ބަދަލުވެ, ލިވަޕޫލްގެ ރަތް ޖާޒީގައި ޞަލާހް ކުޅުނު ފުރަތަމަ ސީޒަންގައެވެ.

އުމުރުން އެންމެ 22 އަހަރުގެ ހާލަންޑްގެ މި ރެކޯޑުގެ އަނެއް ހާއްސަކަމަކީ, އޭނާ 45 ގޯލު ޖެހުމަށް ކުޅުނު މެޗުތަކުގެ އަދަދު މަދު ވުމެވެ. ޞަލާހް އަދި ވެން ނިސްޓެލްރޯއީ 44 ގޯލު 52 މެޗުން ކާމިޔާބު ކުރިއިރު, ސީޒަނުގައި އަދި ގިނަ މެޗުތަކެއް ބާކީ އޮއްވައި ހާލަންޑު މި ރިކޯޑު މި ގާއިމްކުރީ 39 މެޗު ކުޅެގެންނެވެ. 

Advertisement

ޖަރުމަނުގެ ބޮރޫޝިއާ ޑޯޓްމަންޑުން 5 އަހަރުގެ ކޮންޓްރެކްޓެއްގައި އިނިގިރޭސި ލީގުގެ ޗެމްޕިއަން މެންޗެސްޓަރ ސިޓީއަށް ހާލަންޑު ބަދަލުވީ 2022 ވަނަ އަހަރުގެ ޖުލައި މަހުއެވެ. ޑޯޓްމަންޑުގައި ދެ ސީޒަނާއި ބައި ހޭދަކޮށްފައިވާއިރު, އޭނާ ވަނީ އެ ކްލަބުގައި ވެސް ތަފާތު މޮޅު ކުޅުމެއް ދައްކާފައެވެ. އެގޮތުން ޖުމްލަ 89 މެޗުން 86 ގޯލު ކާމިޔާބު ކޮށްފައިވެއެވެ.

ހުރިހާ ގޮތަކުން ބަލާއިރު ވެސް ހާލަންޑްއަކީ ފުރިހަމަ 'ސްޓްރައިކަރ' އެކެވެ. އިސްކޮޅުންދިގު, ހަލުވި, މަތިން އަންނަ ބޯޅަތަކަށް ފަރިތަ އަދި ދެ ފައިން ވެސް ކުޅުމުގެ ހުނަރު ލިބިފައިވުމަކީ މި ފުރިހަމަ ކަމުގެ އަސްލުކަމުގައި ނުވެ ނުދާނެކަން ކަށަވަރެވެ. އަދި މިއީ ކުރިން މެންޗެސްޓަރ ސިޓީއަށް ކުޅުނު އާޖެންޓީނާގެ ހުނަރުވެރި ފޯވާޑް, ސަރޖިއޯ އަގުއެރޯ, ގެ ރަގަޅު ބަދަލަކަށް ވާނެ ކަމާއިމެދު މިހާތަނަށް ހާލަންޑް ދައްކާފައިވާ ކުޅުމުން ޔަގީންކުރެވެއެވެ. 

ހާލަންޑްގެ ވާހަކަ ޔޫރަޕްގައި އަޑު ހަރުކޮށް ދެކެވެން ފެށީ އޭނާ އޮސްޓްރޭލިއާގެ ޗެމްޕިއަން, ރެޑް ބުލް ސަލްސްބަރގް އަށް ބަދަލުވުމަށްފަހުއެވެ. 2019 ގައި އެޓީމަށް ކުޅެން ފެށި ފަހުން އެ އަހަރުގެ އޯގަސްޓް މަހާއި ސެޕްޓެމްބަރ މަހު އެކަނިވެސް, ޖުމްލަ 9 މެޗުން އޭނާ ވަނީ ވަނީ 17 ގޯލު ޖަހާފައެވެ. ހާލަންޑް ޗެމްޕިއަންސް ލީގުގައި ފުރަތަމަ ފަހަރަށް ކުޅުނީ ވެސް މި މުއްދަތުގައެވެ. ބެލްޖިއަމްގެ ގެންކް އާއި ދެކޮޅަށް ކުޅުނު އެ މެޗުގައި ހާލަންޑް ވަނީ 9 ގޯލު ޖަހާ 3 ހެޓްރިކް ފުރިހަމަ ކޮށްފައެވެ.