ކަރަންޓު ބިލު އަބަދުވެސް ތައްޔާރުކުރަނީ މީޓަރ ރީޑިންގ އަށް ބަލައިގެންކަމާއި އަދި މީޓަރު ހިނގާނީ އެ ގޭބިސީއަކުން ކަރަންޓު ބޭނުންކުރާ މިންވަރަކުންކަމަށް ސްޓެލްކޯއިން ބުނެފިއެވެ. ސްޓެލްކޯއިން މިހެން ބުނީ, ބައެއް މީޑިއާ ތަކުގައި އެކުންފުންޏާއި ގުޅިގެން ހިއްސާކޮށްފައިވާ ހަގީގަތާއި ޚިލާފު ވާހަކަތަކަކަށް އިޝާރާތް ކުރަމުންނެވެ. އެގޮތުން މީޓަރުގެ ރީޑިންގ ނެގުމަކާއި ނުލައި ކަރަންޓު ބިލުތައް ބޮޑު ކޮށްފައިވާކަމަށް ބުނެ ދެކެވޭ ވާހަކަތައް އެ ކުންފުނިން ވަނީ ދޮގުކޮށްފައެވެ.

ސްޓެލްކޯއިން ބުނީ, އޮޅުވާލާފައި ނުވާކަން އެ ކުންފުނީގެ މޯބައިލް އެޕްލިކޭޝަން މެދުވެރިކޮށް ކަސްޓަމަރުންނަށް ޔަގީންކުރެވޭނެ ކަމަށެވެ. އަދި އެޕްލިކޭޝަން މެދުވެރިކޮށް އެ ގޭބިސީއަކަށް ކަރަންޓު ބޭނުން ކުރެވިފައިވާ މިންވަރު އަމިއްލަފުޅަށް ޗެކޮކޮށް ހިސާބު ކުރެވޭނެކަމަށް ވެސް އެ ކުންފުނިން ހާމަކުރެއެވެ. 

އެ ކުންފުނިން އިތުރަށް ހާމަކޮށްފައިވާ ގޮތުގައި, ކަރަންޓު ބިލު ބޮޑުވެގެން ގޮސްފައިވަނީ ދިވެހިރާއްޖޭގެ ފިނިހޫނުމިން ފެބުރުވަރީމަހުން މެއި މަހާ ހަމައަށް މައްޗަށް ގޮސްފައިވާތީ, ކަރަންޓު ބޭނުންކުރާ މިންވަރު އިރުތުވެގެން ކަމަށެވެ.