ހުޅުމާލޭގައި އާއްމުން ދިރިއުޅުމަށް ދޫކޮށްފައިވާ ގޯތިތަކުގައި 10 ފަންގިފިލާއަށް ޢިމާރާތް ކުރެވޭގޮތަށް އާރބަންކޯއިން ޤަވާއިދަށް ބަދަލު ގެނެސްފިއެވެ. ހުޅުމާލޭގައި ޢާންމު ދިރިއުޅުމަށް މިހާތަނަށް ޢިމާރާތް ކުރުމުގެ ހުއްދަ އޮތީ ޓެރަހާއެކު 7 ފަންގިފިލާއަށެވެ. ނަމަވެސް އިމާރަތް ކުރުމުގެ ޤަވާއިދަށް ގެނައި ބަދަލާއެކު، ހުޅުމާލެއިން ގެދޮރުވެރިކަމަށް ކަނޑައަޅާފައިވާ ރެޒިޑެންޝަލް ޕްލޮޓްތަކުގައި ގެތައް 10 ފަންގިފިލާއަށް ނުވަތަ 31 މީޓަރަށް ޢިމާރާތް ކުރެވޭނެކަމަށް އާރބަންކޯއިން ބުނެއެވެ.

ހުޅުމާލޭގައި ޢާންމުން ދިރިއުޅުމަށް ދޫކޮށްފައިވާ ގޯތި ތަކުގައި ޢިމާރާތްކުރެވޭނެ އެންމެ އުސްމިނަށް ބަދަލު ގެނެސްފައިމިވަނީ، ހުޅުމާލެއާއި ގުޅީފަޅު އަދި ގިރާވަރުފަޅުން ގޯތި ދިނުމަށް ނިންމާ ގޯތި ދޫކުރަން ފަށާފައިވާ ވަގުތެއްގައެވެ. 

އަލަށް އެކުލަވާލި ޤަވާއިދު ބުނާގޮތުން 15 މީޓަރަށްވުރެ އުސް ޢިމާރާތެއްގައިނަމަ ލިފްޓު ބެހެއްޓުން ލާޒިމްކުރެއެވެ. އަދި ލިފްޓްގެ މެޝިން ރޫމް އެންމެ އުސްވެގެން ބެހެއްޓޭނީ ޓެރަހުން ފެށިގެން ހަތަރު މީޓަރަށްކަމަށްވެސް ޤަވާއިދުގައި ބަޔާންކުރެއެވެ.

އައު ޤަވާއިދުގައި ވަނީ ޢިމާރާތުގައި ހުންނަ އެޕާޓޫމަންޓުގެ ޢަދަދަށްބަލައި ޕާކިން ޖާގަ ކަނޑައެޅުމަށްވެސް ލާޒިމްކޮށްފައެވެ. މިގޮތުން، މަދުވެގެން ދެ ސައިކަލު ޕާކް ކުރާނެ ޖާގަ ކޮންމެ ދެ ކޮޓަރީގެ އެޕާޓްމަންޓަކަށް ކަނޑައަޅަން ޖެހޭނެކަމަށާއި، ކޮންމެ އެއް ކޮޓަރީގެ އެޕާޓްމަންޓް އަކަށް އެއް ސައިކަލު ޕާކް ކުރާނެ ޖާގަ ކަނޑައަޅަން ޖެހޭނެ ކަމަށް އާރބަންކޯއިން ބުނެއެވެ.