ހއ. އިހަވަންދޫ މަސްކިރާ ބަނދަރު ތަރައްޤީ ކުރުމަށް އެމްޓީސީސީއާއި ހަވާލުކޮށްފިއެވެ.

އިހަވަންދޫ މަސްގަންނަ ފެސިލިޓީ ބަނދަރު ތަރައްޤީކުރުމުގެ މަޝްރޫޢުއައް މިނިސްޓްރީ އޮފް ނޭޝަނަލް ޕްލޭނިންގް، ހައުސިންގ އެންޑް އިންފްރާސްޓްރަކްޗަރ އިން އެމްޓީސީސީއާއި ހަވާލުކުރީ 500 ދުވަހުގެ ތެރޭގައި ނިންމާގޮތަށެވެ. މި މަސައްކަތް ހަވާޅުކޮށްފައިވަނީ 60.2 މިލިއަން ރުފިޔާއަށެވެ.

މަސްކިރާ ބަނދަރު މަޝްރޫޢުގެ މަސައްކަތް ނިމުމުން މަސްވެރިންނަށް ފަސޭހަލިބޭނެއެވެ. އެގޮތުން މަސްކިރަން މާލެ ނުވަތަ ފެލިވަރަށް ދާންޖެހޭ ޖެހުން ނިމުމަކަށް އަންނާނެއެވެ. އަދި އެ ދަތުރުގެ ޚަރަދުވެސްކުޑަވެގެންދާނެކަން އެރަށު ކައުންސިލުން ފާހަގަކުރައްވައެވެ.

މި މަޝްރޫޢުގެތެރެއިން 24 މީޓަރުގެ ރިވެޓްމަންޓް ޖަހައި 129 މީޓަރުގެ ޝީޓް ޕައިލް ކީވޯލް ޖަހާނެއެވެ އަދި 6މީޓަރުގެ އެލް ބްލޮކް ކީވޯލް ޖެހުމަށްވެސް ވަނީ ނިންމާފައެވެ. މީގެ އިތުރުން އެއްގަމުތޮށި ވަށައިގެން ޕޭވްމަންޓް ހެދުމާއި، ޕޭވްމަންޓްގައި ފެން ހިންދުމަށް ކާނު ހެދުމަށްވެސް މަޝްރޫޢުގައި ހިމެނެއެވެ.

3500 މީހުންގެ އާބާދީއެއް އޮންނަ ހއ. އިހަވަންދޫ ރައްޔިތުން އާމްދަނީ ހޯދުމަށް އެންމެ ބޮޑަށް ބަރޯސާވާ ދެ ސިނާއަތަކީ މަސްވެރިކަމާއި އޮޑިފަހަރު ބަނދެ އެހެލުމެވެ. އެގޮތުން އެ ރަށުގައި މިހާރުވެސް މަހަށްދާ15 ދޯންޏާއ،ި އޮޑިފަހަރު އެހެލާ ބަނުމަށް ހަދާފައިވާ 27 ހަރުގެ ހުރެއެވެ.