ރާއްޖޭގެ 24 ރަށެއްގައި، 40 މެގަވޮޓް އަވާގެ ބެޓަރީ އެނާޖީ ސްޓޯރޭޖް ސިސްޓަމް ގާއިމްކުރުމަށް ބަޔަކާ ހަވާލުކޮށްފި އެވެ. މިއީ އަވިން އުފައްދާ ހަކަތަ ރައްކާ ކުރާ ނިޒާމެކެވެ.

މަސައްކަތް ހަވާލުކޮށްފައިިވަނީ ޗައިނާގެ ނެޝަނަލް ޓެކްނިކަލް އިމްޕޯޓް އެންޑް އެކްސްޕޯޓް ކޯޕަރޭޝަން އާއި އެ ގައުމުގެ ގުއަޑިއަން ނަންޖިންގް އޮޓޯމޭޝަން ކޯ ލިމިޓެޑް އަދި ސީނޯ ސޯލާ ހައިބްރިޑް (ބެއިޖިން) ޓެކްނޯލޮޖީ ކޯ ލިމިޓެޑް ގުޅިގެން އުފައްދާފައިވާ ޖޮއިންޓް ވެންޗާ ކުންފުންޏަކާއެވެ.

އެއްބަސްވުމުގައި އެންވަޔަރަމެންޓް މިނިސްޓްރީގެ ފަރާތުން ސޮއިކުރެއްވީ މިނިސްޓަރު އައިމިނަތު ޝައުނާއެވެ. އަދި ކޮންޓްރެކްޓަރުގެ ފަރާތުން ސޮއިކުރެއްވީ ސީނިއާ ޕްރޮޖެކްޓް މެނޭޖަރު ވަންގް ޕެއިޓާއެވެ.

މި މަޝްރޫއުގެ ދަށުން 40 މެގަވޮޓް އަވާގެ ބެޓަރީ އެނާޖީ ސްޓޯރޭޖް ސިސްޓަމް ބަހައްޓާއިރު، އަވީގެ ހަކަތައިން އުފައްދާ ކަރަންޓުން އެ ވަގުތެއްގައި ބޭނުންކޮށް އިތުރުވާ ކަރަންޓު މި ނިޒާމުގައި ރައްކާ ކުރެވޭނެ އެވެ.

މި ނިޒާމްތައް ގާއިމްކުރާ ރަށްތަކަކީ:

- ހދ. ކުޅުދުއްފުށި

- ށ. ފުނަދޫ

- ޅ. ނައިފަރު އަދި ހިންނަވަރު 

- ބ. އޭދަފުށި

- ގއ. ވިލިނގިލި

- ގދ. ތިނަދޫ

- ލ. އަތޮޅުން : ފޮނަދޫ، ގަން، ދަނބިދޫ، އިސްދޫ، ކަލައިދޫ، މާބައިދޫ، މާމެންދޫ، ކުނަހަންދޫ، ހިތަދޫ އަދި މާވަށް

- އައްޑޫ : ހިތަދޫ، ފޭދޫ، މަރަދޫ ފޭދޫ، މަރަދޫ، ހުޅުދޫ އަދި މީދޫ

- ފުވައްމުލައް ސިޓީ

މިއީ ވޯލްޑް ބޭންކުގެ އެހީގައި ސަރުކާރުން ހިންގާ މަޝްރޫއެކެެވެ. ކަރަންޓު ވިއުގައަށް ފޯރުކޮށްދޭ އިއާދަކުރަނިވި ހަކަތަ، އެ ރަށެއްގެ ޑިމާންޑްގެ ނިސްބަތުން %30އަށް ވުރެ މައްޗަށްދާ ހާލަތްތަކުގައި، ގްރިޑް ސްޓެބިލިޓީ މައްސަލަތައް ހަމައަކަށް އަޅުވައި އާންމުކޮށް ކަރަންޓް ކެނޑުމަށް ދިމާވާ ގިނަ ހާލަތްތަކަށް ލުޔެއް ލިބޭނެ ކަމަށް އެންވަޔަރަމަންޓް މިނިސްޓްރީން ބުންޏެވެ.