ޕެރިސް ސެއިންޓް ޖާމައިން (ޕީއެސްޖީ) ދޫކޮށް ބްރެޒިލްގެ ފުޓްބޯޅަ ސުޕަސްޓާ ނޭމާ ސައުދީ ޕްރޯ ލީގުގެ އަލް ހިލާލް އަށް ބަދަލުވެއްޖެއެވެ. ރިޕޯޓްތައް ބުނާގޮތުން ނޭމާ ގެންދިއުމަށް އަލް ހިލާލް އިން ޕީއެސްޖީއަށް 90 މިލިއަން ޔޫރޯ (98 މިލިއަން ޑޮލަރު) ގެ ޓްރާންސްފާ ފީއެއް ދައްކަން އެއްބަސްވެފައިވެއެވެ. އަދި އެ އަދަދަކީ ސައުދީ ލީގަށް ކުޅުންތެރިއަކު ގެނައުމަށް ހުށަހަޅާ ރެކޯޑު އަދަދެކެވެ.

އަލް ހިލާލް އިން ނޭމާއަށް ދެ އަހަރުގެ ކޮންޓްރެކްޓެއް ހުށަހަޅާފައިވާއިރު، އުމުރުން 31 އަހަރުގެ ބްރެޒިލް ތަރިއަށް އަހަރަކު ގާތްގަނޑަކަށް 100 މިލިއަން ޑޮލަރުގެ މުސާރައެއް ލިބޭނެކަމަށް ބެލެވެއެވެ.

އަލް ހިލާލް އަށް ބަދަލުވުމަށްފަހު ނޭމާ ބުނެފައިވާ ގޮތުގައި އެ ކްލަބަކީ ބޮޑު ކްލަބެއް ކަމަށާއި އެ ޓީމުގެ ސަޕޯޓަރުންނަކީ ވަރަށް ޖޯޝުގައި ޓީމާ ސަޕޯޓްކުރާ ބައެއް ކަމަށެވެ. އަދި އެއީ އޭނާ އެޓީމަށް ބަދަލުވުމަށް ނިންމި އެއް ސަބަބު ކަމަށާއި، ސައުދީ ލީގުގައި ގިނަ ގޯލްތަކެއް ޖަހާ، ގިނަ ޓްރޮފީ ހޯދުމަކީ އޭނާގެ އަމާޒު ކަމަށް ވެސް ބުނެފައިވެއެވެ.

ބާސެލޯނާ އިން ނޭމާ ޕީއެސްޖީއާ ގުޅުނީ 2017 ވަނަ އަހަރު ވޯލްޑް ރެކޯޑް ފީއަކަށެވެ. އެއީ 222 މިލިއަން ޔޫރޯ (242 މިލިއަން ޑޮލަރު) އަށެވެ. ޕީއެސްޖީގައި ހޭދަކުރި 6 ސީޒަނުގައި ގިނަ އަނިޔާތަކެއް ކުރިމަތިވި ނަމަވެސް އޭނާ ވަނީ 173 މެޗުކުޅެ 118 ގޯލު ޖަހައިފައެވެ. 

އޭނާ ފްރެންޗް ލީގު-1 ގައި 5 ތަށި އަދި 3 ފްރެންޗް ކަޕް ކާމިޔާބުކުރި ނަމަވެސް، ޗެމްޕިއަންސް ލީގު ނެގުމާއި އެންމެ ކައިރިކުރި  2020 ވަނަ އަހަރުގެ ފައިނަލުގައި ބަޔާން މިއުނިކް އަތުން ބަލިވުމުން، ޔޫރަޕްގެ އެންމެ ބޮޑު ތަށި އޭނާއަށް ވަނީ ޕީއެސްޖީއާ އެކު ކާމިޔާބުކުރެވޭ ގޮތް ނުވެފައެވެ.

އަލް ހިލާލް އަކީ ސައުދީ އަރަބިއްޔާ އާއި އޭޝިއާގެ އެންމެ ކާމިޔާބު އެއް ކްލަބެއެވެ. އެ ކްލަބުން ވަނީ ސައުދީ ލީގު 18 ފަހަރު ކާމިޔާބުކޮށް، އޭޝިއަން ޗެމްޕިއަންސް ލީގު 4 ފަހަރު ހޯދައިފައެވެ.