މިދިޔަ ޖުލައި މަހުގެ 9 ވަނަ ދުވަހު ސަދާން ރީޖަނަލް މެޑިކަލް ސެންޓަރ ކިޔާ ޔޫއެސްގެ ކްލޭޓަން ކަންޓްރީގެ ހޮސްޕިޓަލެއްގައި އުފަންވުމުގެ ތެރޭގައި ކުއްޖާގެ ބޯ ވަކިވުމުން ވިއްސުމުގައި ބައިވެރިވި ޑޮކްޓަރާއި އޭނާއަށް އެހީވުމުގައި މަސައްކަތްކުރި ނަރުހުންތަކެއް ޝަރީޢަތަށް ހާޒިރުކޮށްފިއެވެ. މައުލޫމާތު ލިބޭ ގޮތުގައި ޑޮކްޓަރު މިހާރު ވަނީ ވަޒީފާއިން ވަކިކޮށްފައެވެ. މި މުވައްޒަފުންގެ އިތުރަށް ހޮސްޕިޓަލާ ދެކޮޅަށް ވެސް ކޯޓުގައި މައްސަލަތަކެއް އުފުލާފައި ވެއެވެ.

މި މައްސަލަ އުފުލާފައިވަނީ ކުއްޖާގެ މަންމައާއި ބައްޕައެވެ. މި މައްސަލަ އާއިލާއިން އުފުލަންޖެހިފައިވަނީ ކުއްޖާ މަރުވީމައެއް ނޫނެވެ. ނަމަވެސް ވިއްސުމުގެ ތެރެއިން ވެސް ކުއްޖާގެ މަންމަ ޖެސިކާއާ މެދު ޑޮކްޓަރ ޓްރޭސީ އަނިޔާވެރި ގޮތްގޮތަށް އަމަލުކޮށްފައި ވާތީއެވެ. ހަމައެއާއެކު މި ދިމާވި ހާދިސާ ފޮރުވުމަށް ޑޮކްޓަރު ވަނީ މަސައްކަތް ކޮށްފައެވެ. ޑޮކްޓަރުގެ އިތުރަަށް އޭނާއާއެކު މަސައްކަތް ކުރި ނަރުހުންތަކެއްވެސް މި އަމަލުގައި ބައިވެރިވިކަމަށް ތުހުމަތު ކުރެވިފައިވެއެވެ. 
ހޮސްޕިޓަލުން ކުއްޖާގެ ފުރާނަ ނެތް މަސްގަނޑު ނެރުނު އިރު ވެސް އާއިލާއަށް ކުއްޖާގެ ކަރު ވަކިވެފައިވާކަން ނޭނގޭކަމަށް އާއިލާއިން ފާހަގަކުރެއެވެ. އަދި މިކަން ހާމަވީ ޖަނާޒާގެ ކަންކަން ފެށި ފަހުން ކަމަށް އާއިލާއިން ބުނެއެވެ.

މި މައްސަލައާ ބެހޭ އިތުރު މައުލޫމާތު ކޯޓުން އަދި މީޑިއާތަކާ ހިއްސާކޮށްފައެއް ނުވެއެވެ. ނަމަވެސް އާއިލާއިން ތިބީ އިހުމާލުވާ ފަރާތްތައް އިންސާފުގެ ކުރިމައްޗަށް ގެނައުމުގެ އުންމީދުގައެވެ.

Advertisement