ކްލިއަރ ކުރުން ލަސްވާ މުދާ ބާލާ ބެހެއްޓޭނެ ސްޓޯރޭޖް ފެސިލިޓީއެއް މޯލްޑިވްސް ޕޯޓްސް ލިމިޓެޑް، އެމްޕީއެލްގައި ހަދައިފިއެވެ.

އެމްޕީއެލްއިން ބުނީ މިސްޓޯރޭޖް ފެސިލިޓީ ހެދީ ކުދި ވިޔަފާރިތަކަށް މުދާ ގެންނަ ފަރާތްތަކުގެ އެދުމުގެމަތިން ކަމަށެވެ.  ކުދި ވިޔަފާރިކުރާ ފަރާތްތަކުން ގިނަ ވިޔަފާރިތައް އެކުވެ އެއް ކޮންޓެއިނަރުގައި މުދާ އެތެރެކުރާކަމަށާއި ނަމަވެސް އެއިން ވަކި މުދަލެއް ކްލިއަރ ކުރަން ލަސްވިނަމަވެސް، މުޅި ކޮންޓެއިނަރަށް ބޮޑު ފީ އެއް އިތުރަށް ދައްކަންޖެހޭކަން އެމްޕީއެލްއިން ވަނީ ފާހަގަކޮށްފައެވެ.

އެމްޕީއެލްގެ ސީއީއޯ ޝާހިދު އަލީ ވިދާޅުވީ، އަލަށް އިތުރުކުރި ސްޓޯރޭޖް ކެޕޭސިޓީއާއެކު، ކޮންޓެއިނަރުން އަވަހަށް މުދާ ހުސްކޮށް، ކޮންޓެއިނަރަށް ދަންކަންޖެހޭ ފީން ސަލާމާތްވާނެކަމަށެވެ. ކަމަށް ޝާހިދު އަލީ ވިދާޅުވިއެވެ. އަދި މިގޮތަށް ކޮންޓެއިނަރުތައް ހުސްނުވެ، ލަސްވުމަކީ ޝިޕިންލައިންތަކަށްވެސް އޭގެ ދަތިކަން ދިމާވާ ކަމެއްކަމަށް ޝާހިދު ވިދާޅުވިއެވެ.

ކްލިއަރ ކުރުން ލަސްވާ މުދާ ބާލާ ބެހެއްޓުމަށް އެމްޕީއެލްއިން ޤާއިމްކުރި ސްޓޯރޭޖް ފެސިލިޓީގައި 550 ކިއުބިކް މީޓަރު(ސީބީއެމް)ގެ މުދާ ބެހެއްޓޭނެކަމަށް އެ ކުންފުނިން ވަނީ ބުނެފައެވެ. އެއީ 16 ކޮންޓެއިނަރުގެ މުދަލެވެ. އެމްޕީއެލް ސްޓޯރޭޖްގައި ސީބީއެމަކަށް ނަގަނީ ދުވަލަކަށް 26 ރުފިޔާއެވެ. ކޮންޓެއިނަރަށް ދުވާލަކަށް 35 ޑޮލަރު ދައްކަންޖެހެއެވެ. ދެތިންދުވަހު މުދާ ކްލިއަރ ނުވެއްޖެނަމަ 150 ޑޮލަރަށްވުރެ ބޮޑު އެއްޗެއް ދައްކަންޖެހެއެވެ. ނަމަވެސް އެމްޕީއެލްގެ ސްޓޯރޭޖް ފެސިލިޓީގައި ހުންނަ ނަމަ އެއީ 300ވަރަކަށް ރުފިޔާކަމަށާއި މިއީ ކުދި ވިޔަފާރިތަކަށް ލިބިގެންދިޔަ ބޮޑު ލުޔެއްކަމަށް އެ ކުންފުނިން ބުނެއެވެ.