ރާއްޖެގައި ފުރަތަމަ ފަހަރަށް މީހުން ދިރިއުޅޭ ރަށަކަށް ކަނޑު ހުރަސްކޮށް ކަރަންޓް ކޭބަލެއް އަޅައިފިއެވެ.

މިކަރަންޓް ވިއުގަ ގުޅާލާފައިވަނީ ފަރެސްމާތޮޑާ އެއަރޕޯޓުގައި ޤާއިމްކުރި ޒަމާނީ އިންޖީނުގެއިން ފަރެސް މާތޮޑާއަށެވެ. 

މި އިންޖީނުގެއަކީ 10 މެގަވޮޓްގެ ކަރަންޓް އުފެއްދޭ ފެންވަރަށް ޤާއިމްކޮށްފައިވާ އިންޖީނުގެއެއް ކަމަށް ފެނަކައިން ބުނެއެވެ. އަދި މި އިންޖީނުގެއަކީ ބޭރަށް އެއްވެސް އަޑެއް ނީވޭނެހެން ސައުންޑް ޕުރޫޕްކޮށް ހަދާފައިވާ ޒަމާނީ ފެންވަރުގެ އިންޖީނުގެއެކެވެ.

މިއިންޖީނުގެއިން ފަރެސް މާތޮޑާއަށް ކަރަންޓް ފޯރުކޮށްދެނީ ކަނޑު ހުރަސްކޮށް އަޅާފައިވާ ކޭބަލް ވިއުގައަކުންނެވެ. މިއިންޖީނުގެއިން ކުރިއަށް އޮތް 50 އަހަރަށް އެއްވެސް ދަތިކަމެއް ނެތި ކަރަންޓްގެ ޚިދުމަތް ފޯރުކޮށްދެވޭނެ ކަމަށް ފެނަކައިން ބުނެއެވެ.

ފަރެސްމާތޮޑާ އެއަރޕޯޓްގައި ހަދާފައިވާ މި އިންޖީނުގޭގެ ކެޕޭސިޓީއަކީ 1840 ކިލޯވޮޓެވެ. ސަރުކާރުން އަންނަނީ ރަށްރަށުގައި މީހުން ދިރިއުޅޭ ސަރަޙައްދުތަކުގައި ހުރި އިންޖީނުގެތައް މީހުން ދިރިނޫޅޭ ސަރަޙައްދަށް ބަދަލުކުރަމުންނެވެ. އެގޮތުން މިހާރުވެސް މިގޮތައް ހުރި ގިނަ ރަށްރަށެއްގެ އިންޖީނުގެ ވަނީ ބަދަލުކޮށްފައެވެ.