ރައީސް ޑރ.މުހައްމަދު މުއިއްޒުގެ ސަރުކާރުން ޑޮލަރު މާރުކުރުމުގެ އުސޫލަށް ގެނައި ބަދަލާއެކު، ޑޮލަރު އަގުހެޔޮވުމުގެ ބަދަލުގައި ވާންފެށި ގޮތަކީ ޑޮލަރުގެ އަގު މައްޗަށް ދިއުން ކަމުގައި އެމްޑީޕީގެ ކުރީގެ ރައީސް އިބްރާހިމް ދީދީ (ޑީޑީ) ވިދާޅުވެއްޖެއެވެ.

ރާއްޖެ ޓީވީއަށް ދެއްވި އިންޓަވިއުއެއްގައި ޑީޑީ ވިދާޅުވީ، ޑޮލަރުގެ ސިޔާސަތަށް ގެނައި ބަދަލުގެ ސަބަބުން އާއްމުންނަށް އެތައް ގެއްލުމެއް ވީ ނަމަވެސް ސަރުކާރުން ތިބީ އެކަން ވަރިހަމަކޮށްގެން ކަމަށެވެ. މިހާރު ޑޮލަރުގެ އަގު އިންތިހާ އަށް އުފުލިފައިވާ ކަމަށާއި ޑޮލަރުގެ ސިޔާސަތު ބަދަލުކުރީ ވަރަށް ޚުދުމުހުތާރުކޮށް ކަމަށް އޭނާ ވިދާޅުވިއެވެ.

ސަރުކާރުން އާއްމުންނަށް ދިމާވާ ތަކުލީފުތައް ކުޑަކުރުމަށް އެއްވެސް މަސައްކަތެއް ކުރަމުން ނުދާ ކަމަށާއި، ޑޮލަރު ލިބުމުގައި ދަތިވުމުގެ ސަބަބުން ތަކެތީގެ އަގު އިންތިހާއަށް އުފުލިފައިވާ ކަމަށް ވެސް ޑީޑީ ވަނީ ވިދާޅުވެފައެވެ.

ޑޮލަރުގެ އަގު ތިރިކުރަން ސަރުކާރުން އަޅަމުންދާ ފިޔަވަޅުތަކާއެކީ، 2027 ވަނަ އަހަރުގެ ތެރޭގައި ރަސްމީ ރޭޓުގައި ޑޮލަރު ލިބެން ފަށާނެ ކަމަށް ރައީސް ޑރ. މުހައްމަދު މުއިއްޒު ވަނީ މި އަހަރުގެ މޭއި މަހުގެ ތެރޭގައި ވިދާޅުވެފައެވެ.

ނަމަވެސް މިހާރުވެސް ކަޅު ބާޒާރުގައި ޑޮލަރު ވިއްކަން ހުރި އަގު ދަށް ނުވެ، އެ އަގު އިންތިހާ އަށް އުފުލެމުން ދިއުމަކީ ވިޔަފާރިވެރިންގެ އިތުރުން އާއްމުންގެ ވަރަށް ބޮޑު ކަންބޮޑުވުމެކެވެ.