ސަރުކާރު ހިންގާ ކޯލިޝަނުން، މޯލްޑިވިން ޑިވެލޮޕްމަންޓް އެލަޔަންސް (އެމްޑީއޭ) ވަކިވެފައިވާ ކަމަށް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވެއްޖެ އެވެ.

ރައީސުލްޖުމްހޫރިއްޔާ މިހެން ވިދާޅުވީ ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ. ރައީސް ވިދާޅުވީ، ސަރުކާރު ކޯލިޝަންގައި މިހާރު އެމްޑީއޭ ނެތް ކަމަށެވެ. އެހެންކަމުން މިހާރު، ވެރިކަން ހިންގުމުގައި އިތުރު އެއްވެސް ޕާޓީއެއްގެ ބައިވެރިވުމެއް ނެތެވެ.

ނަމަވެސް، ސަރުކާރު ކޯލިޝަން އިން އެމްޑީއޭ ވަކިވެފައިވާ ސަބަބެއް ސާފުކޮށް ރައީސް މުޢިއްޒު ވިދާޅުވެފައި ނުވެ އެވެ. އޭގެ ބަދަލުގައި ރައީސް މުޢިއްޒު ވިދާޅުވީ، މައްސަލައެއް ނުޖެހޭ ކަމަށާއި، ކޮންމެ ވެސް ވަރެއްގެ ޚިޔާލު ތަފާތުވުންތަކެއް އުފެދުނު ކަމަށެވެ.

އެންމެ ފަހުން 2023 ވަނަ އަހަރު އޮތް ރިޔާސީ އިންތިޚާބުގެ ފުރަތަމަ ބުރުގައި އެމްޑީއޭ އިން ކޯލިޝަން ހެދީ އޭރުގެ ރައީސް އިބްރާހިމް މުޙައްމަދު ޞާލިޙާ އެކު އެވެ. އެ ކޯލިޝަން އުވާލީ އިންތިޚާބުގެ ދެ ވަނަ ބުރުގަ އެވެ.

ރިޔާސީ އިންތިޚާބަށް ފަހު، 2024 ވަނަ އަހަރު އޮތް ރައްޔިތުންގެ މަޖިލީހުގެ އިންތިޚާބުގައި ޕީއެންސީ އާއި އެމްޑީއޭ އޮތީ ކޯލިޝަންގަ އެވެ. އެގޮތުން އެމްޑީއޭގެ ލީޑަރު އަދި މީދޫ ދާއިރާގެ މެމްބަރު އަހުމަދު ސިޔާމް މުޙައްމަދުގެ ދާއިރާ އަށް ޕީއެންސީ އިން ވާދަ ވެސް ނުކުރެ އެވެ.