ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހާރު މަސައްކަތް ކުރައްވަނީ އާއްމު ރައްޔިތންގެ އަޑު ކަނޑުވާލުމަށް ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ. ފައްޔާޒް މިހެން ވިދާޅުވީ އެމްޑީޕީއިން ހުކުރު ދުވަހުގެ ރޭ ބޭއްވި ގައުމީ މަޖިލީހުގެ ކުއްލި ބައްދަލުވުމުގައި ވާހަކަ ދައްކަވަމުންނެވެ.

މީގެ އިތުރުން ސަރުކާރުގެ މުއައްސަސާތަކުގެ ބާރު ކަނޑުވާލުމަށް ވެސް ރައީސުލްޖުމްހޫރިއްޔާ މަސައްކަތް ކުރަމުންދާކަމަށް ފައްޔާޒް ވަނީ ތުހުމަތުކުރައްވާފައެވެ.

އެމްޑީޕީގެ ގައުމީ މަޖިލީހުގެ ކުއްލި ބައްދަލުވުމެއް ބޭއްވީ އެއްވެ އުޅުމުގެ މިނިވަންކަން ނަގާލުމަށްޓަކައި މިއަދުގެ ސަރުކާރުން ރައީސް މުއިއްޒު އަޅުއްވާ ހުރަސްތަކަށް، ކަންބޮޑުވުން އޮތުމުން އެކަމުގެ މަޝްވަރާތައް ކުރުމުގެ ގޮތުން ކަމަށް، އެ ޕާޓީގެ ޗެއާރޕާސަން ހާމަކުރެއްވިއެވެ. އެގޮތުން މަސައްކަތްތެރިންގެ ފަރާތުން ރާވާ އިންތިޒާމްކުރި މޭޑޭ ރެލީއަށް ފުލުހުން ވަނީ ހުރަސްއަޅާފައި ކަމަށާއި އަދި ޒުވާނުން ކުރަމުންދިޔަ ސުލްހަވެރި އިހްތިޖާޖަށް ފުލުހުން ހުރަސް އަޅައި ބާރުގެ ބޭނުންކޮށް، ދެމީހަކު ހައްޔަރުކޮށް އެއްވުން ރޫޅާލި މަންޒަރު ކަމަށާއި، އެގޮތުން އެމްޑީޕީއަކީ އަބަދުވެސް އެއްވެ އުޅުމުގެ މިނިވަންކަން ނަގަހައްޓާ ދަމަހައްޓަން ވަކާލާތުކުރާ ޕާޓީއެއް ކަމަށެވެ.

މިއަދު މިގައުމުގައި އެތައް ކަމެއް ގޯހުންދާއިރުގައި، ބަސް ކިޔަން އޮތް ހުރިހާ މުއައްސަސާއެއްގެ ކޮންޓްރޯލް ނަގަމުން ކަމަށާއި، ރައްޔިތުންގެ މަޖިލީހުގެ އަޑު ކަނޑުވާލާފައި ކަމަށާއި ކޯޓްތަކުގެ ބާރު ކަނޑުވާލާފައިވާއިރު މިނިވަން މުއައްސަސާއެއް މިއަދު ނެތް ކަމަށް ފައްޔާޒު ވިދާޅުވިއެވެ.

ހަމަ އެކަނި ރައްޔިތުންގެ ފަރާތުން ބަހެއް ބުނަން އޮތީ އެމްޑީޕީއާއި އަދި އިތުރު ބައެއް ސިޔާސީ ޕާޓީތަކުން ކަމަށާއި ގައުމު އެއްކޮށް ކަނޑުވާލުމަށް ރައީސް މުއިއްޒު ދަނީ މަސައްކަތްކުރަމުން ކަމަށްވެސް ފައްޔާޒު ވިދާޅުވިއެވެ.