ސްޓެލްކޯގެ މައި އިންޖީނެއްގެ ދުންހޮޅީގައި ރޯވެ އަލިފާނުގެ ހާދިސާއެއް މިއަދު ހިނގައިފިއެވެ.

މި ހާދިސާގައި އެއްވެސް މީހަކަށް އަނިޔާއެއް ނުވެއެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ ފަޔާރ އެންޑް ރެސްކިއު ސާރވިސަސްއިން ހާމަކޮށްފައިވާ ގޮތުގައި، އަލިފާން ރޯވެފައިވަނީ އިންޖީނު ރޫމުގައި ހުރި މައި އިންޖީނެއްގެ ދުންހޮޅީގައެވެ. 

މި ހާދިސާގެ ރިޕޯޓު އެމްއެންޑީއެފްގެ ފަޔާރ އެންޑް ރެސްކިއު ސާރވިސަސްއަށް ލިބުނީ މިއަދުގެ ހެނދުނު 6:19 ހާއިރުކަމަށް އެ ޚިދުމަތުން ހާމަކުރެއެވެ. އެގޮތުން އެ ޚިދުމަތުގެ ފަޔާރ ފައިޓަރުން ވަގުތުން ވަނީ އެ ހާދިސާ ހިނގި ސަރަޙައްދަށް ގޮސްފައެވެ.

އެމްއެންޑީއެފްއިން ހާމަކޮށްފައިވާ ގޮތުގައި 6:30 ހާއިރު އަލިފާންގަނޑު ވަނީ އެއްކޮށް ނިއްވާލެވިފައެވެ.  

މި ހާދިސާގެ ސަބަބުން، ކަރަންޓު ދިނުމުގައި އެއްވެސް މައްސަލައެއް ދިމާވި ކަމުގެ ރިޕޯޓެއް އަދި ނެތެވެ.