ފުލުހުންގެ އިދާރާ ވަގުތީ ގޮތުން ހިންގުން ޑެޕިއުޓީ ކޮމިޝަނަރު ފަރުހާދު ފިކުރީއާ ހަވާލުކުރަން ނިންމި ނިންމުން ބަދަލުކޮށް، ޑެޕިއުޓީ ކޮމިޝަނަރު އިސްމާއިލް ނަވީންއާ ފުލުހުންގެ އިދާރާ ހިންގުން ހަވާލު ކުރައްވައިފިއެވެ.

ފުލުހުންގެ އިދާރާ ހިންގުން ނަވީންއާ ހަވާލުކޮށްފައި މިވަނީ ކޮމިޝަނާ އޮފް ޕޮލިސްގެ މަގާމުގައި ހުންނެވި އަލީ ޝުޖާއު ރޭ ކުއްލި ގޮތަކަށް އިސްތިއުފާ ދެއްވުމާ ގުޅިގެންނެވެ. ނަމަވެސް ފުރަތަމަ މި ޒިންމާ ހަވާލުކުރެއްވީ ޑީސީޕީ ފަރުހާދުއާއެވެ. އަދި އޭގެ ގަޑިއެއްހާއިރު ފަހުން އެ ނިންމެވުން ބަދަލުކޮށް ނަވީންއާ ހަވާލުކުރެއްވީއެވެ.

މި ބަދަލާ ގުޅިގެން ހޯމްލޭންޑް ސެކިއުރިޓީ މިނިސްޓަރު އަލީ އިހްސާން ވިދާޅުވީ، ފުލުހުން މިވަގުތު އެންމެ އިސްކަމެއް ދީގެން ހިންގަމުން ގެންދާ ތަހުގީގުތަކާ އެންމެ އިސްކޮށް ހަވާލުވެވަޑައިގެން ހުންނެވީ ނަވީން ކަމަށްވާތީ ސީޕީގެ މަގާމަށް ބޭފުޅަކު އައްޔަންކުރެވެންދެން އެ އިދާރާ ހިންގުމާ ހަވާލުވެވަޑައިގެން ހުންނަވާނީ ނަވީން ކަމަށެވެ.

ކޮމިޝަނަރ އޮފް ޕޮލިސްގެ މަޤާމުން ޝުޖާއު އިސްތިއުފާ ދެއްވިއިރު، މި މަހުގެ 18 ވަނަ ދުވަހު ފުރާޅެއްގެ މައްޗަށް ވެއްޓިފައި އޮތް ހައްވާ ޔުމްނު ރަޝީދުގެ މައްސަލައިގައި ފުލުހުންގެ ތަޙުޤީޤު ކުރިޔަށްގެންދާ ގޮތުން ގިނަ ބަޔަކު އަންނަނީ ފާޑު ކިޔަމުންނެވެ. އަދި "ދުލެއް ނުކުރާނަން" ނަމުގައި ސިލްސިލާކޮށް ޒުވާނުން ބާއްވަމުން އަންނަ އެއްވުމުގައި ވެސް ސީޕީގެ އިސްތިއުފާއަށް ވަނީ ގޮވާފައެވެ.