ގޭސް ގަތުމުގެ ހުރިހާ ޒިންމާތަކާއި ބާރެއް މޯލްޑިވް ގޭހުގެ އަތުން ނަގައި، އެ ކަން ކުރުމުގެ މަސައްކަތް އެސްޓީއޯ އިން ފަށާފައިވާ ކަމަށް ރައްޔިތުންގެ މަޖިލިހުގެ މާލިއްޔަތު ކޮމިޓީގެ މިއަދުގެ ބައްދަލުވުމުގައި މަޖިލިހުގެ ނައިބު ރައީސް އަހުމަދު ނާޒިމް ވިދާޅުވެއްޖެއެވެ.

މި ބަދަލަކީ ރާއްޖެއަށް ގޭސް އެތެރެކުރާ ސަރުކާރުގެ ކުންފުނި، މޯލްޑިވް ގޭސް އިން ގޭހުގެ ޝިޕްމަންޓަކަށް ދެއްކި އެޑްވާންސް ފައިސާ ވީނުވީއެއް ނޭންގި ގެއްލިފައިވުމާ ގުޅިގެން ގެނެވުނު ބަދަލެކެވެ.

ވީނުވީއެއް ނޭންގި ގެއްލިފައިވަނީ ދުބާއީގެ ކުންފުންޏެއް މެދުވެރިކޮށް، ގޭސް ގަންނަން މިދިޔަ އަހަރުގެ އޮކްޓޫބަރު މަހު އެޑްވާންސް ފައިސާގެ ގޮތުގައި ދެއްކި 240،000 ޑޮލަރު (3.7 މިލިއަން ރުފިޔާ) އަށް ވީނުވީއެއް އެނގިފައި ނުވާތީއެވެ.

އެ މައްސަލަ އެންމެންގެ ސަމާލުކަމަށް އައީ މާލިއްޔަތު ކޮމިޓީގެ މިއަދުގެ ބައްދަލުވުމުގައި، މި ސަރުކާރު ހިންގާ ޕީއެންސީގެ އިސް މެމްބަރެއްގެ ގޮތުގައި ވެސް ހުންނެވި ނާޒިމް ދެއްކެވި ވާހަކަތަކަކާ އެކު އެވެ. އޭނާ ވިދާޅުވީ، "ގެއްލުނު" ފައިސާ އަދި ރިކަވާ ކުރެވިފައި ނުވި ނަމަވެސް އެ މައްސަލާގައި އެސްޓީއޯ އިން ފިޔަވަޅު އަޅާފައިވާ ކަމަށެވެ.

ވީނުވީއެއް ނޭންގި ގެއްލިގެން މި އުޅޭ ފައިސާއަކީ، ރާއްޖެއަށް އާންމުކޮށް ގޭސް ގެންނަ ކުންފުނި ބަދަލުކުރުމަށްފަހު، އައު ކުންފުނި މެދުވެރިކޮށް ގެންނަން އުޅުނު ފުރަތަމަ ޝިޕްމެންޓެވެ. ފަހުން ގޭސް ސަޕްލައި ކުރުމަށް ހަމަޖެއްސީ ދުބާއީގެ ކުންފުންޏަކާއެވެ. އަދި އެ ކުންފުންޏަށް ފުރަތަމަ ޝިޕްމެންޓުގެ އެޑްވާންސްގެ ގޮތުގައި ދެއްކީ %30 އެވެ.

މާލިއްޔަތު ކޮމެޓީގައި ނާޒިމް ވިދާޅުވިގޮތުގައި، ގޭސް ގަންނަމުން އައި ކުންފުނި ބަދަލުކުރި ސަބަބު ވެސް މޯލްޑިވް ގޭހަށް ސާފުނުކޮށްދެވުނެވެ. އެ ކަން ހައްލުކުރަން ކުންފުނީގެ މެނޭޖިން ޑިރެކްޓަރު އަބްދުﷲ މުހައްމަދަށް ފުރުސަތު ދެއްވި ކަމަށާއި ނަމަވެސް އެ ފައިސާ މިހާތަނަށް ރިކަވާ ނުކުރެވޭ ކަމަށް ނާޒިމް ވިދާޅުވިއެވެ.