ފިޝަރީޒް މިނިސްޓްރީގެ ޑެޕިއުޓީ މިނިސްޓަރު އަހުމަދު ޝާފިއު މިއަދު މަޤާމުން އިސްތިއުފާ ދެއްވައިފިއެވެ.

މަޤާމުން އިސްތިއުފާ ދެއްވައި ޝާފިޢު ކުރެއްވި ޕޯސްޓުގައި ވިދާޅުވީ، ކަންކަން ހައްލުކޮށްދެއްވާނެ ކަމުގެ އުއްމީދުގައި މިއަދުން ފެށިގެން މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގެ ނައިބުގެ މަގާމުން އޭނާ އިސްތިއުފާ ދެއްވާފައިވާ ކަމަށެވެ.

ސަރުކާރުން މަސްވެރިކަމުގެ ސިނާޢަތުގެ ކަންކަން ރަނގަޅު ކުރުމަށް މަސައްކަތް ކުރަމުން އަންނައިރުވެސް، ބައެއް ކަންކަން އެދެވޭ ގޮތުގައި ކުރިޔަށް ނުދާކަން އޭނާ ފާހަގަކުރައްވާފައިވެއެވެ.

ޝާފިޢުއަކީ މަސްވެރިކަމުގެ ސިނާޢަތުގައި އަމިއްލަފުޅަށް އިންވެސްޓްކޮށް އެވިޔަފާރީގައިވެސް އުޅުއްވާ ބޭފުޅެކެވެ. އެހެން ނަމަވެސް މަޤާމުން އިސްތިއުފާ ދެއްވީ ސީދާ ކޮން ސަބަބަކާއި ގުޅިގެން ކަމެއް އޭނާ ހާމަކުރައްވާފައެއް ނުވެއެވެ.

ޝާފިޢު ފިޝަރީޒް މިނިސްޓަރުގެ ނައިބުގެ މަޤާމަށް ޢައްޔަނުކުރައްވާފައި ވަނީ، 2023 ވަނަ އަހަރުގެ ޑިސެމްބަރުމަހުގައެވެ. ޓީޗަރެއްގެ ގޮތުގައި ތަޢުލީމީ ދާއިރާގައިވެސް ޚިދުމަތްކުރެއްވި ޝާފިޢުއަކީ، މަސްވެރިކަމުގެ ސިނާޢަތާއި މީޑިއާ އާގުޅޭ ގިނަ މަސައްކަތްތަކެއްވެސް ކުރައްވަމުން ގެންދަވާ ބޭފުޅެކެވެ.