ފޮޓޯ: އިންޑިއާ ޓައިމްސް
ހަދިޔާ ކުރީ ކިޑްނީ، ބަދަލުގައި ވަކިކޮށްލީ ވަޒީފާއިން
އެއީ 2011 ވަނަ އަހަރުގެ އޯގަސްޓް މަހެވެ. ޑެބީ ސްޓީވަން ނަމަކަށް ކިޔާ މި އަންހެނާ މަސައްކަތްކުރަމުން ދިޔައީ ނިއުޔޯކްގެ އެޓްލާންޓިކް އޮޓޮމޯޓިވް ގްރޫޕް ކިޔާ ކާރު ކުންފުންޏެއްގައެވެ.
ޑެބީގެ ލޯޔަރ ބުނާގޮތުގައި ޑެބީގެ ބޮސްއެއްގެ ގޮތުގައި މަސައްކަތްކުރަމުން ދިޔަ ބްރޫސިއަރއަށް ކިޑްނީ ހަދިޔާ ކުރުމަށް ޑެބީ ނިންމީ 2010 ވަނަ އަހަރުގެ އޮކްޓޯބަރު މަހުގައެވެ. އޭރު ޑެބީ އެ ކުންފުނީގައި މަސައްކަތް ކުރަމުން ދިޔައީ ކޮންޓްރެކްޓް އުސޫލުންނެވެ. ނަމަވެސް ޑެބީގެ މި ނިންމުމުގެ ސަބަބުން ދާއިމީ ވަޒީފާއަކަށް ޑެބީ ޕްރޮމޯޓްވެގެންދިޔައެވެ.
ނަމަވެސް ސާޖަރީއަށް ފަހު ޑެބީއަށް ކުރިމަތިވީ އުނދަގޫ ދުވަސްތަކެކެވެ. އެގޮތުން ދަށްބަނޑަށް ތަދުވުމުގެ އިތުރަށް ކާއެއްޗެހި ހަޖަމްވުމުގައި ވެސް މައްސަލަތައް ކުރިމަތިވިކަމަށް ޑެބީގެ ލޯޔާ ފައިލްކޮށްފައިވެއެވެ. ހަމައެއާއެކު ބަރު އެއްޗެހި އެއްގޮތަކަށް ވެސް ނުއުފުއްލޭ ހާލަތަށް ޑެބީ ދިޔައެވެ. މި ހާލަތުގައި ވެސް ބްރޫސިއަރގެ އެންގުމުގެ މަތިން އެ އަހަރުގެ ސެޕްޓެމްބަރު މަހު ޑެބީ މަސައްކަތަށް ނުކުތެވެ. އެ ވަރުން ނިމުނީކީ ނޫނެވެ. ޑެބީއާ މެދު ބްރޫސިއަރ އަމަލުކުރީ އެއްވެސް މީހަކު މި ހާލަތުގައި އުންމީދު ނުކުރާނެފަދަ ގޮތަކަށެވެ. އާންމު ހާލަތުގައި ހުރި މީހަކާ ޑެބީގެ މަސައްކަތާ އެއްވެސް ތަފާތުކަމެއް ނެތި ބުރަކޮށް މަސައްކަތްކުރަން ޑެބީއަށް ޖެހުނެވެ. އެންމެ ކުޑަމިނުން ބްރޫސިއަރގެ ހުއްދަ ނެތި ފާޚާނާއަށް ވެސް ޑެބީއަކަށް ނުދެވެއެވެ.
ކުޑަ ދުވަސްކޮޅަކަށް ފަހު ޑެބީގެ މަސައްކަތުގެ ޙާއްސަ ދާއިރާ ނޫން މަސައްކަތެއް ކުރަން ޖެހުނު ސެކްޝަނަކަށް ޑެބީ ބަދަލުކުރެވިގެން ދިޔައެވެ. އެއީ ބްރޫސިއަރގެ އަމަލުތަކާ މެދު ޑެބީ ހިތްހަމަނުޖެހުން ފާޅުކުރުމުންނެވެ. ނަމަވެސް މި ބަދަލު ވެސް ވީ ޑެބީއާ އެންމެ އެކަށީގެންވާ ބަދަލަކަށް ނޫނެވެ. ދެތިން ހަފްތާ ފަހުން ޑެބީ ވަނީ ވަޒީފާއިން ވަކިކޮށްފައެވެ. އެކަށީގެންވާ މިންވަރަށް ޑެބީއަށް މަސައްކަތް ނުކުރެވޭތީއެވެ. އެއީ 2012 ވަނަ އަހަރުގެ މާރިޗު މަހެވެ.