ވެލާނާ އިންޓަރނޭޝަނަލް އެއާޕޯޓުގެ ޑިޕާޗަރ ޓަރމިނަލްގައި ހުންނަ ޑިއުޓީ ފްރީ ފިހާރަތުން ސިނގިރޭޓް ވަގަށް އެތެރެކުރަން އުޅުނު މައްސަލައެއްގައި ސިފައިންގެ މީހަކުވެސް ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ ހައްޔަރުކޮށްފައި ވަނީ، ނ. ވެލިދޫ ގަސްކަރަ، މުހައްމަދު އައިހަމް ކަމަށެވެ.

އޭނާ ހައްޔަރުކޮށްފައި ވަނީ މިމަހުގެ 21 ވަނަ ދުވަހު ޑިއުޓީ ފްރީ ފިހާރައިން ވަގަށް ސިނގިރޭޓް ބޭރުކުރަން އުޅުނު މައްސަލައެއްގައި ކަމަށް ފުލުހުންގެ އިދާރާއިން ވިދާޅުވިއެވެ. އަދި އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޟިރު ކުރުމުން އޭނާގެ ބަންދަށް 10 ދުވަސް ޖަހައިދީފައި ވާކަމުގައިވެސް ފުލުހުންގެ އިދާރާއިން ވިދާޅުވިއެވެ.

ހައްޔަރުކުރި މުހައްމަދު އައިހަމްއަކީ ސިފައިންގެ މީހެއްކަމެއް ކަމާއި ބެހޭ އިދާރާތަކުން ހާމައެއް ނުކުރެއެވެ. އެހެން ނަމަވެސް ބައެއް މަސްދަރުތަކުން އެނގިފައިވާ ގޮތުގައި އޭނާއަކީ އެމްއެެންޑީއެފްގައި މަސައްކަތްކުރާ މީހެކެވެ.

މިހަފްތާގައި ފުލުހަކާއި އިތުރު މީހަކުވެސް ވަނީ ޑިއުޓީ ފްރީން ވަގަށް ސިނގިރޭޓް ބޭރުކުރަން އުޅުނު މައްސަލައެއްގައި ހައްޔަރުކޮށްފައެވެ.