ސްޕްރީމް ކޯޓުގެ ފަނޑިޔާރުންގެ ތެރެއިން ޖުޑީޝަލް ސާވިސް ކޮމިޝަން (ޖޭއެސްސީ) އިންތިޚާބުކުރާ ފަނޑިޔާރުގެ ގޮތުގައި، ފަނޑިޔާރު ޙުސައިން ޝަހީދު އިންތިޚާބުކޮށް، އެމަނިކުފާނު ޖުޑީޝަލް ސަރވިސް ކޮމިޝަންގެ މެމްބަރު ކަމުގެ މަޤާމަށް ޢައްޔަނުކުރައްވައިފިއެވެ.

ކުރިން ސްޕްރީމް ކޯޓުގެ ފަނޑިޔާރުންގެ ތެރެއިން ޖޭއެސްސީއަށް ޢައްޔަނުކުރައްވާފައިވާ މެމްބަރުގެ މަޤާމު ފުރުއްވަމުން ގެންދެވީ ކުރީގެ ފަނޑިޔާރު އަލްއުސްތާޛު ޙުސްނުއްސުޢޫދެވެ.

ސުޢޫދު ފަނޑިޔާރު ކަމުގެ މަޤާމުންނާއި ޖޭއެސްސީގެ މެމްބަރުކަމުގެ މަޤާމުން އިސްތިއުފާދެއްވީ ޝަރުޢީދާއިރާއަށް ސަރުކާރުން ނުފޫޒު ފޯރުއްވަވަމުން ގެންދަވާކަމުގެ ތުހުމަތު ތަކާއި އެކުގައެވެ. ޝަހީދަކީ، ސުޢޫދު އިސްތިއުފާ ދެއްވުމުން އެކޯޓުގެ ފަނޑިޔާރު ކަމުގެ މަޤާމަށް ޢައްޔަނުކުރެއްވި ބޭފުޅާއެވެ. ޝަހީދު ކުރިން ހުންނެވީ، ދިވެހިރާއްޖޭގެ ހައިކޯޓުގެ އިސް ފަނޑިޔާރުކަމުގެ މަޤާމުގައެވެ.

ސްޕްރީމްކޯޓަށް ޝަހީދު ޢައްޔަނުކުރައްވައި ފަނޑިޔާރުކަމުގެ ހުވައިކުރެއްވީ މި ފެބުރުއަރީ މަހުގެ 19 ވަނަ ދުވަހުގައެވެ.