ގޯތި ވައްކަމުގެ ތުހުމަތުވި މީހުންނަށް އެޅި ފިޔަވަޅުތައް އުވާލައިފިއެވެ.

ވަގު ޑޮކިއުމެންޓް ބޭނުންކޮށްގެންނާއި، ބިންވެރިޔާ ސްކީމުގައި ނުހިމެނޭ ބަޔަކަށް ގޯތިތަކެއް ދިން މައްސަލައިގައި އެޗްޑީސީގެ ކުރީގެ މެނޭޖިންގ ޑައިރެކްޓަރ އިބްރާހީމް ފަޟުލް ރަޝީދު ހިމެނޭހެން އެޗްޑީސީގެ އިސްވެރިންނާއިކު ޖުމުލަ 20 މީހެއްގެ ޕާސްޕޯޓު ހިފަހައްޓައި ފުރުން މަނާކުރިއެވެ. އެހެން ނަމަވެސް އެ އެންމެންގެވެސް ޕާސްޕޯޓުތައް ހިފަހައްޓައި ދަތުރުކުރުން މަނާކޮށްފައި އޮތް އޮތުން މިހާރު ވަނީ ދޫކޮށްލާފައިކަމުގައި މައުލޫމާތު ލިބިފައިވެއެވެ. އެހެން ނަމަވެސް އެމައްސަލައިގެ ތަޙްޤިޤާއި ގުޅޭ ގޮތުން މިހާތަނަށް ފުލުހުން އެކަށީގެންވާ މައުލޫމާތެއް ހާމަކޮށްފައެއް ނުވެއެވެ.

ޕާސްޕޯޓު ހިފެހެއްޓި މީހުންގެ ތެރޭގައި އެމްޑަބުލިޔު އެސްސީގެ ކުރީގެ ޑެޕިއުޓީ މެނޭޖިން ޑައިރެކްޓަރ މުހައްމަދު ފަޒީލް ރަޝީދުވެސް ހިމެނެއެވެ. އޭނާއަކީ، ވަގު ޑޮކިއުމެންޓްތަކެއް ހުށައަޅައިގެން ބިންވެރިޔާ ސްކީމުން ގޯއްޗެއް ލިބިފައި ނުވަނީސްވެސް ގޯއްޗެއް ހޯދާފައިވާ މީހެކެވެ. އޭނާއަށް ގޯތި ދިނުމުގައި ފަޟުލުގެ ބައިވެރިވުން އޮތްކަަމަށްވެސް ވަނީ ތުހުމަތުކޮށްފައެވެ.

އެމައްސަލަތައް ފެންމަތިވުމުން ފަޟުލް ވަނީ، މަޤާމުން އިސްތިއުފާ ދެއްވާފައެވެ. އޭނާގެ މައްޗަށް ކުރެވުނު ތުހުމަތުތަކާއި ގުޅިގެން ފަޟުލް ދިރިއުޅޭގެ ފުލުހުން ބަލައި ފާސްކޮށް އެގެއިން ނަގުދު ފައިސާގެ ގޮތުގައި ހުރި 1.4 މިލިޔަން ރުފިޔާ ހޯދިއެވެ. އެހެން ނަމަވެސް އެފައިސާ ފަހުން ފުލުހުން ވަނީ ފަޟުލްއާ ހަވާލުކޮށްފައެވެ.