ވެލާނާ އިންޓަރނޭޝަނަލް އެއާޕޯޓުގެ ޑިޕާޗަރ ޓަމިނަލްގައި ހުންނަ ޑިއުޓީފްރީ ފިހާރަތަކުން ގިނަ އަދަދެއްގެ ސިނގިރެޓް ބޭރު ކުރަން އުޅުނު މައްސަލައިގަ ހައްޔަރު ކުރި މީހުން ޝަރުޠުތަކާއި އެކު ކޯޓުން ދޫކޮށްލައިފިއެވެ.

އެމީހުން ހައްޔަރުކޮށްފައި ވަނީ އިއްޔެ ހެނދުނުގައެވެ.

ފުލުހުންގެ އިދާރާއިން ވިދާޅުވީ، އެމައްސަލައިގައި ހައްޔަރުކޮށްފައި ވަނީ، ދަފްތަރު ނަމްބަރު ރސ 14358 އުމުރުން 38 އަހަރުގެ ޔޫސުފް ނަޛީރު އާއި މ. ސިލްވަރ ނެސްޓް އުމުރުން 45 އަހަރުގެ އަޙްމަދު އަފްޞަލް ކަމަށެވެ. އެދެމީހުންގެ ބަންދާއިމެދު ގޮތެއް ނިންމުމަށް ކޯޓަށް ހާޟިރު ކުރުމުން ޝަރުޠުތަކަކާއި އެކު ދޫކޮށްލާފައިވާ ކަމަށް ފުލުހުންގެ އިދާރާއިން ވިދާޅުވިއެވެ. މިމައްސަލައިގައިހައްޔަރުކުރި ނަޛީރަކީ ފުލުހެކެވެ. އެހެން ނަމަވެސް އޭނާ އާއި މެދު ފުލުހުންގެ އިދާރާއިން އެޅީ ކޮން ފިޔަވަޅެއް ކަމެއް ފުލުހުންގެ އިދާރާއިން ހާމަކޮށްފައެއް ނުވެއެވެ.

ފުލުހުން ހާމަކޮށްފައިވާ ގޮތުގައި ޑަސްބިން ކޮތަޅުތަކެއްގައި އެމީހުން ވަނީ ޑިއުޓީފްރީން 140 ކާޓޫނު ސިނގިރޭޓް ބޭރުކޮށްފައެވެ. އެމީހުން ހުއްޓުވާފައިވަނީ ކަސްޓަމްސްއިންނެވެ.