މަޤާމުގެ ނުފޫޒު ބޭނުންކޮށްގެން ބިދޭސީ މަސައްކަތްތެރިންގެ އަތުން ފައިސާ ހޯދަމުންދިޔަ ކަމުގެ ތުހުމަތުގައި ހައްޔަރުކުރި އިމިގްރޭޝަންގެ އޮފިސަރުންގެ ބަންދުގެ މުއްދަތު އިތުރުކޮށްފިއެވެ.

ފުލުހުންގެ އިދާރާއިން ވިދާޅުވީ އެމީހުންގެ ބަންދާއި މެދު ގޮތެއް ނިންމުމަށް ކްރިމިނަލްކޯޓަށް ޙާޟިރުކުރުމުން އެތިން މީހުންގެ ތެރެއިން ދެމީހަކު 10 ދުވަހަށް އަދި އަނެއް މީހާ ތިން ދުވަހަށް ބަންދުގައި ބެހެއްޓުމަށް އަމުރުދީފައިވާ ކަމަށެވެ. 

އެމައްސަލައިގައި އިމިގްރޭޝަންގެ ތިން އޮފިސަރަކު ފުލުހުން ހައްޔަރުކޮށްފައި ވަނީ ހުކުރު ދުވަހުގެ ރޭގައެވެ. އެމީހުން ހައްޔަރުކޮށްފައި ވަނީ، ބިދޭސީއެއްގެ އަތުން ފައިސާ ހިފައިގެން އިމިގްރޭޝަން ކޮންޓްރޯލަރ ދިރިއުޅޭ ގެއަށް ދިޔަ ފަހުންނެވެ.

ފުލުހުން ވަނީ ޝަމްޢާން ދިރިއުޅޭގެ ބަލައިފާސްކޮށް އެގެއިން ބައިމިލިޔަން ރިފިޔާ ހޯދާފައި ކަމުގައި ފުލުހުންގެ އިދާރާއިން ވިދާޅުވެފައިވެއެވެ. އެމައްސަލައިގައި އިމިގްރޭޝަންގެ ކޮންޓްރޯލަރ ގެ މަޤާމުން ވަކިކޮށް އޭނާ ވަނީ ހައްޔަރުކޮށްފައެވެ.