ސްޓެލްކޯގެ ހިންގުމާއި ޙުސައިން ފަޙްމީ ހަވާލުވުމަށްފަހުގައި އެކުންފުންޏަށް ގެނައި އިސްލާޙީ ބަދަލުތަކާއި އެކު ކުންފުނީގެ ފައިދާ ރެކޯޑް މިންވަރަކަށް އިތުރުވެއްޖެއެވެ.

2023 ވަނަ އަހަރު ސްޓެލްކޯއަށް 171.9 މިލިޔަން ރުފިޔާގެ ގެއްލުމާއި ކުރިމަތިވިއެވެ. އެހެން ސަރުކާރު ބަދަލުވެ ކުންފުނީގެ މެނޭޖިންގ ޑައިރެކްޓަރު ކަމުގެ މަޤާމާއި ޙުސައިން ފަޙުމީ ހަވާލުވެވަޑައިގެންނެވުމަށްފަހުގައި މި ނިމުނު އަހަރުގެ ތެރޭގައި ސްޓެލްކޯ ވަނީ ގެއްލުމުން އަރައިގަނެ އަލުން ފައިދާވާ ކުންފުންޏަކަށް ވެފައެވެ.

ސްޓެލްކޯއިން ހާމަކޮށްފައިވާ ތަފާސް ހިސާބުތަކަށް ބަލާއިރު މި ނިމުނު 2024 ވަނަ އަހަރު އެކުންފުންޏަށް، 137.9 މިިލިއަން ރުފިޔާގެ ފައިދާއެއް ވަނީ ލިބިފައެވެ. މިއީ އެމްޑީޕީގެ ސަރުކާރުގެ ފަސް އަހަރުގައިވެސް އެކުންފުންޏަށް ނުހޯދޭ އަދަދެކެވެ.

"މިއީ ކުންފުނީގެ ތާރީހުގައި ހޯދި އެންމެ ރަނގަޅު އެއް ނަތީޖާކަމަށް ފާހަގަކުރަން. އަދި މި ކާމިޔާބީއަކީ ކުންފުނީގެ މާލީ ހާލަތު ރަނގަޅުވަމުން އަންނަކަމުގެ ހެއްކެއް،" ކުންފުންޏަށް ހާޞިލްކުރެވުނު ކާމިޔާބީތަކާއި ގުޅޭ ގޮތުން ފަޙްމީ ވިދާޅުވިއެވެ.

ކުރީ ސަރުކާރުގެ ފުރަތަމަކޮޅު ސްޓެލްކޯއަށް ފައިދާވީ ނަމަވެސް އެ ސަރުކާރުގެ ދައުރު ނިމުނު އިރު ސްޓެލްކޯއަށް އޮތީ މާލީ ގޮތުން ބޮޑު ގެއްލުމަކާއި ކުރިމަތިލާން ޖެހިފައެެވެ.

ސްޓެލްކޯއަކީ މާލެ ސަރަހައްދުގެ އިތުރުން، މާލެ އަތޮޅާއި ވ އަތޮޅުގެ ބައެއް ރަށްރަށުގައިވެސް ކަރަންޓްގެ ޚިދުމަތް ދެމުންއަންނަ ސަރުކާރުގެ ކުންފުންޏެކެވެ.