އެމްޑީޕީން މިރޭ މާލޭގައި ކުރިޔަށް ގެންދިޔަ މުޒާހަރާގެ ތެރެއިން -- ފޮޓޯ: އެމްޑީޕީ
އެމްޑީޕީގެ ސިލްސިލާ މުޒާހަރާތައް މެދުކަނޑާލައިފި
އިދިކޮޅު ޕާޓީ އެމްޑީޕީން ސިލްސިލާކޮށް މާލޭގައި ކޮންމެ ރެއަކު ބާއްވަމުން އަންނަ ސިލްސިލާ މުޒާހަރާތައް މިރެއިން ފެށިގެން މެދުކަނޑާލައިފިއެވެ.
އެމްޑީޕީން މީގެ 12 ދުވަސްކުރިން ފެށި ސިލްސިލާ މުޒާހަރާތައް މެދު ކަނޑާލީ، ބަރަކާތްތެރި ރަމަޟާން މަހުގެ ފަހު ދިހައިގެ ރޭތައް މާދަމާ ރެއިންފެށިގެން ފެށޭތީކަމުގައި އެޕާޓީން ވަނީ އިއުލާނުކޮށްފައެވެ. އަދި ރަމަޟާން މަސް ނިމުމާއެކު އަލުން ސިލްސިލާ މުޒާހަރާތައް ކުރިޔަށް ގެންދާނެ ކަމުގައިވެސް އެޕާޓީން މިރޭ ވަނީ އިޢުލާނުކޮށްފައެވެ.
އިދިކޮޅު އެމްޑީޕީން ފާއިތުވި 12 ރޭ މާލޭގައި ސިލްސިލާ މުޒާހަރާތައް ކުރިޔަށް ގެންދިޔައިރު، މުޒާހަރާތަކުގެ އިސްސަފުގައު ހަރަކާތްތެރިވާ ފަރާތްތައް އަންނަނީ ފުލުހުންގެ އިދާރާއަށް ހާޟިރުކުރަމުންނެވެ.
އެމްޑީޕީގެ މުޒާހަރާތަކުގައި އަންނަނީ ރައީސުލްޖުމްހޫރިއްޔާގެ އިސްތިއުފާއަށް ގޮވާލައި، ރާއްޖޭގެ އިޤުތިޞާދީ ހާލަތާއި މެދު ކަންބޮޑުވުން ފާޅުކުރަމުންނެވެ. އަދި ގެދޮރުވެރިޔާ ސްކީމުގެ ދަށުން ފްލެޓް ލިބުނު ފަރާތްތައް ޑިސްކޮލިފައިކޮށް، މިސަރުކާރުން ބޭނުންވާ މީހުންނަށް ފްލެޓްތައ ބަހާލާފައިކަމަށް ބުނެ އެކަމާއި މެދުވެސް އަންނަނީ އަޑު އުފުލަމުންނެވެ.