ކުޑަ ފިރިހެން ކުއްޖަކަށް ބޮޑު ފިރިހެނަކު ޖިންސީ ގޯނާކޮށްފައިވާ މައްސަލައެއް ހުށައެޅި ބަލަމުންދާކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުުންގެ އިދާރާއިން މިހެން ވިދާޅުވީ، އުތުރުގެ އަތޮޅުގެ ރަށެއްގައި ކުޑަ ފިރިހެންގެ ކުއްޖެއްގެ ގަޔަށް އިންޖެކްޝަނެއް ޖަހައި، ބޮޑު ފިރިހެނަކު އެކުއްޖާ ރޭޕްކޮށްފައިވާ ކަމަށް ބުނާ މައްސަލައެއް ރިޕޯޓްކޮށްފައިވޭތޯ ފުލުހުންގެ ރަސްމީ މީޑިއާ ގުރޫޕުގައި ނޫސްވެރިއަކު ސުވާލު ކުރުމުންނެވެ.

ފުލުހުންގެ އިދާރާއިން ވިދާޅުވީ، މާލޭގައި އުމުރުން 18 އަހަރު ނުފުރޭ ކުޑަ ފިރިހެން ކުއްޖަކަށް މީހަކު ޖިންސީ ގޯނާ ކުރި މައްސަލައެއް މީގެ ދޮޅު މަސްކުރިން ހުށައަޅާފައިވާ ކަމަށެވެ. އެމައްސަލަ ހުށައަޅާފައި ވަނީ މިއަހަރުގެ ޖެނުއަރީ މަހުގެ 27 ވަނަ ދުވަހުގައި ކަމަށް ފުލުހުންގެ އިދާރާއިން ވިދާޅުވިއެވެ. ނަމަވެސް އެމައްސަލަ އާއި ގުޅެ ގޮތުން ފުލުހުން އިތުރު ތަފްސީލެއް ހާމައެއް ނުކުރެއެވެ.

ކުޑަކުދިންނާއި ގުޅޭ ކުށުގެ މައްސަލަ ތަކުގައި އެކުދިންގެ އައިޑެންޓިޓީ ރައްކާތެރި ކުރުމުގެ ގޮތުން ކުށުގެ ތުހުމަތުވާ ފަރާތްތަކުގެ މައުލޫމާތުވެސް ފުލުހުން އާއްމެއް ނުކުރެއެވެ.