ރޯދަމަހުގެ ފުރަތަމަ ހަފްތާ ނިމިގެން ދިޔައިރު، މިހާތަނަށް މާލެ ސަރަހައްދުގެ 48000 ގޭ ބިސީއަށް މަސްދަޅުކޭސް ދޫކޮށްފައިވާ ކަމުގައި މިނިސްޓަރ އޮފް ސިޓީސް ލޯކަލް ގަވަރމެންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ،  ރޯދަ ހަދިޔާ ބެހުމުގެ މަސައްކަތް ކުރިޔަށްދާގޮތާއި ގުޅޭ ގޮތުން އެކްސްގައި ކުރެއްވި ޕޯސްޓެއްގައެވެ.

މިނިސްޓަރ އާދަމް ޝަރީފް ވިދާޅުވީ، މިރެއާ މާދަމާރޭ، މިހާރެކޭ އެއްގޮތަށް 13 މަރުކަޒުގައި ރޯދަ ހަދިޔާ ދޫކުރުން ކުރިޔަށްދާނެ ކަމަށެވެ. އެހެން ނަމަވެސް އަންގާރަ ދުވަހުން ފެށިގެން ދެން މަސްދަޅު ކޭސް ދޫކުރާނީ، މިފްކޯގެ ފިހާރަތަކުން އެކަނި ކަމުގައިވެސް މިނިސްޓަރ ވިދާޅުވިއެވެ.

މިނިސްޓަރ އާދަމް ޝަރީފް އުމަރު ވިދާޅުވީ، ގިނަ ފަރާތްތަކަކަށް ރޯދަ ހަދިޔާ ދޫކުރެވިފައިވުމާއެކު، މާޗް 11 ވަނަ ދުވަހުން ފެށިގެން، ރޯދަ ހަދިޔާ ދޫކުރާނީ މިފްކޯގެ ފިހާރަތަކުން ކަމަށާއި، މާލެ އަދި ހުޅުމާލޭގައި ހުރި މިފްކޯގެ 4 ފިހާރަ ހުޅުވިފައި ހުންނަ ގަޑި ތަކުގައި މަސްދަޅު ކޭސް ދޫކުރަމުން ދާނެ ކަމަށެވެ. އަދި ރޯދަ ހަދިޔާ ދޫކުރާ މަރުކަޒުތައް 11 ވަނަ ދުވަހުން ފެށިގެން ބަދަލުވީ ނަމަވެސް، ދޫކުރުން ކުރިޔަށްދާނީ މިހާރެކޭ އެއްގޮތަށް، އޮންލައިން ޓޯކަން ނިޒާމުގެ ތެރެއިންކަމަށާއި، ރޯދަ ހަދިޔާ މަސްދަޅު ކޭސް ބޭނުންވާ ހުރިހާ ފަރާތްތަކަށް މަސްދަޅު ކޭސް ލިބެންދެން މަސްދަޅު ކޭސް ބެހުން ކުރިޔަށް ގެންދާނެ ކަމުގައިވެސް މިނިސްޓަރ ވިދާޅުވިއެވެ.

މާލެ ސަރަހައްދުގައި މަސްދަޅު ކޭސް ބަހަން ފަށާފައި ވަނީ ފެބުރުއަރީ މަހުގެ 21 ވަނަ ދުވަހުގެ ރޭގައެވެ.